રાજકોટ શહેરમાંથી એક અત્યંત ચોંકાવનારી અને દહેશત ફેલાવતી ઘટના સામે આવી છે. શહેરના વ્યસ્ત વિસ્તાર ગણાતા 150 ફૂટ રિંગરોડ પર આવેલી એક સોસાયટીના પાર્કિંગમાં અચાનક ભીષણ આગ લાગવાની દુર્ઘટના સર્જાઈ હતી. આ આગ એટલી ભયાનક હતી કે જોતજોતામાં એક કારમાંથી ફેલાઈને વારાફરતી પાંચ કાર તેની ચપેટમાં આવી ગઈ હતી અને તમામ વાહનો બળીને સંપૂર્ણપણે ખાખ થઈ ગયા હતા. સદનસીબે આ ગંભીર દુર્ઘટનામાં કોઈ પણ પ્રકારની જાનહાનિ થયાના સમાચાર નથી, જેના કારણે તંત્ર અને સ્થાનિક રહીશોએ રાહતનો શ્વાસ લીધો છે.
માધવ પાર્કના કોમન પાર્કિંગમાં બની ઘટના
પ્રાપ્ત વિગતો અનુસાર, રાજકોટના 150 ફૂટ રિંગરોડ પર પુનિતનગર પાછળ આવેલા માધવ પાર્ક સોસાયટીના કોમન પાર્કિંગ પ્લોટમાં આ આગ લાગી હતી. રાત્રિના કે અચાનક બનેલી આ ઘટનામાં કોઈ અગમ્ય કારણોસર પાર્ક કરેલી એક કારમાં અચાનક આગ સળગી ઉઠી હતી. જોતજોતામાં આગે વિકરાળ સ્વરૂપ ધારણ કરી લીધું હતું અને તેની આસપાસ પાર્ક કરેલી અન્ય ગાડીઓને પણ પોતાની લપેટમાં લઈ લીધી હતી. એક પછી એક એમ વારાફરતી કુલ ૫ કાર આગની ચપેટમાં આવી ગઈ હતી અને ભારે નુકસાન થયું હતું.