રાજકોટ જિલ્લાના ઉપલેટા શહેરમાં નગરપાલિકા તંત્રની અજબ-ગજબ કામગીરી સામે આવી છે. ઉપલેટાના કોલકી રોડ પર આવેલા મુખ્ય પ્રવેશદ્વાર (ગેટ) પર નગરપાલિકા તંત્ર દ્વારા મોડી રાત્રે અચાનક 'બાબાનું બુલડોઝર' ફેરવી દેવામાં આવ્યું હતું. પાલિકાની ટીમે જેસીબી અને બુલડોઝરની મદદથી આ ગેટનું ડીમોલેશન હાથ ધરીને તેને સંપૂર્ણપણે તોડી પાડ્યો હતો. અંધારાના પટમાં હાથ ધરાયેલી આ કામગીરીને લઈને સ્થાનિકો અને રાહદારીઓમાં ભારે આશ્ચર્ય સાથે ચર્ચા જાગી છે.
બનેલો ગેટ તોડી નવા ગેટ માટે ઠરાવ
આ ગેટ જ્યારે બનાવવામાં આવ્યો હતો ત્યારે નગરપાલિકા દ્વારા પ્રજાના ટેક્સના લાખો રૂપિયાનો ખર્ચ કરવામાં આવ્યો હતો. હવે એ જ ગેટને તોડી પાડીને અન્ય જગ્યાએ નવો ગેટ બનાવવા માટે ઉપલેટા નગરપાલિકાની સામાન્ય સભામાં ઠરાવ પસાર કરાયો હોવાની વિગતો સામે આવી છે. લાખો રૂપિયાના ખર્ચે નિર્માણ પામેલા ગેટને આ રીતે તોડી પાડતાં નગરપાલિકાની આયોજન વગરની કામગીરી અને બુદ્ધિના પ્રદર્શન સામે શહેરીજનોમાં ભારે વિરોધ અને સવાલો ઉભા થયા છે.