રાજકોટ શહેરમાં તાજેતરમાં બનેલી છ હત્યાઓ અને વધતા જતા ગેંગવોરની ઘટનાઓને પગલે પોલીસ તંત્ર સફાળું જાગ્યું છે. ગુનાખોરીને કડક હાથે ડામી દેવા માટે પોલીસ કમિશનરની અધ્યક્ષતામાં તાત્કાલિક એક ક્રાઇમ કોન્ફરન્સનું આયોજન કરવામાં આવ્યું હતું. આ કોન્ફરન્સમાં શહેરના તમામ ઝોનના ACP અને DCP સહિતના ઉચ્ચ અધિકારીઓ હાજર રહ્યા હતા. પોલીસ કમિશનરે સ્પષ્ટ સૂચના આપી છે કે હવે શહેરમાં ગુનેગારો અને લુખ્ખા તત્વોની બેફામ પ્રવૃત્તિઓ ચલાવી લેવામાં નહીં આવે અને તેમના પર સખ્ત તવાઈ બોલાવવામાં આવશે.
હથિયાર રાખવા પર કડક જાહેરનામું
શહેરમાં વધી રહેલી હથિયારોની અવૈધ હેરફેર અને તેના ઉપયોગ પર નિયંત્રણ લાવવા માટે પોલીસે એક નવું જાહેરનામું બહાર પાડ્યું છે. આ જાહેરનામા મુજબ, હવે કોઈપણ વ્યક્તિ જો હથિયાર સાથે ઝડપાશે તો તેની સામે સૌથી કડક કાયદેસરની કાર્યવાહી કરવામાં આવશે. પોલીસે ગુનેગારોને ચેતવણી આપી છે કે જાહેર શાંતિ ભંગ કરનારા અને હથિયારોનો ઉપયોગ કરનારા તત્વોને કોઈ પણ સંજોગોમાં બક્ષવામાં નહીં આવે. આ જાહેરનામું ખાસ કરીને ગુનાખોરી અને હથિયારોના પ્રદર્શનને અટકાવવા માટે જારી કરવામાં આવ્યું છે.
