રાજકોટ શહેરમાં પ્રકાશના મહાપર્વ દિવાળીની રાત્રે કાયદો અને વ્યવસ્થાની સ્થિતિને લાંછન લગાવતી અત્યંત ચકચારી અને લોહીયાળ ઘટના સામે આવી છે. શહેરના માલવિયાનગર પોલીસ સ્ટેશન વિસ્તારમાં ફટાકડા ફોડવા જેવી સામાન્ય બાબતમાં થયેલી બોલાચાલીએ ભયાનક સ્વરૂપ ધારણ કર્યું હતું. પ્રાથમિક તકરાર બાદ મામલો થાળે પડી ગયો હોવા છતાં, અદાવત રાખીને બે સગા ભાઈઓએ પિતા-પુત્ર પર છરી અને ધોકા વડે ઘાતકી હુમલો કર્યો હતો. આ હિંસક હુમલામાં પિતા અજિત સિંધવ પર છરીના સાતથી આઠ ઘા ઝીંકી દેવામાં આવતા સારવાર દરમિયાન તેમનું કરૂણ મોત નીપજ્યું હતું, જ્યારે પુત્ર ગંભીર રીતે ઘાયલ થતાં હોસ્પિટલમાં જીવન-મરણ વચ્ચે ઝોલાં ખાઈ રહ્યો છે. બનાવની જાણ થતાં જ માલવિયાનગર પોલીસે તાત્કાલિક એક્શન મોડમાં આવી હત્યા કરનારા બંને આરોપી ભાઈઓને ગણતરીના કલાકોમાં દબોચી લીધા છે.
સમાધાન બાદ પથ્થરમારો કર્યો અને ઘરમાં ઘૂસી છરીના ઘા ઝીંક્યા
દિવાળીની રાત્રે માલવિયાનગર વિસ્તારમાં ફટાકડા ફોડવાને લઈને અજિત સિંધવ અને તેમના પુત્ર કૃણાલ સિંધવ સાથે સ્થાનિક શખ્સોની બોલાચાલી થઈ હતી. જોકે, સ્થાનિક લોકોની દરમિયાનગીરીથી તે સમયે મામલો શાંત થઈ ગયો હતો.સમાધાન થઈ ગયા બાદ પણ આવેશમાં આવેલા ઇન્દ્રજીતસિંહ જાડેજા અને યશરાજસિંહ જાડેજા નામના બે સગા ભાઈઓએ પિતા-પુત્રને ઉશ્કેરવા માટે તેમના ઘર પર પથ્થરમારો શરૂ કર્યો હતો. ત્યારબાદ બંને ભાઈઓ છરી અને ધોકા જેવા ઘાતક હથિયારો સાથે તૂટી પડ્યા હતા. આરોપીઓએ અજિત સિંધવને નિશાન બનાવી છાતી અને પેટના ભાગે ઉપરાઉપરી ૭ થી ૮ ઘા ઝીંકી દીધા હતા. પિતાને બચાવવા વચ્ચે પડેલા પુત્ર કૃણાલ સિંધવ પર પણ હુમલો કરી તેને ગંભીર ઈજાઓ પહોંચાડવામાં આવી હતી.લોહીલુહાણ હાલતમાં બંને પિતા-પુત્રને તાત્કાલિક સિવિલ હોસ્પિટલ ખસેડાયા હતા, જ્યાં સારવાર દરમિયાન ગંભીર ઈજાઓને કારણે પિતા અજિત સિંધવનું કમકમાટીભર્યું મોત નીપજ્યું હતું, જ્યારે પુત્ર કૃણાલ હાલ હોસ્પિટલમાં સારવાર હેઠળ છે.