Rajkot News: મારવાડી યુનિવર્સિટીમાં વિદ્યાર્થીના આત્મહત્યા મામલે ઉગ્ર વિરોધ, ABVP કાર્યકર્તાઓ પર પોલીસનો બળપ્રયોગ

રાજકોટની જાણીતી મારવાડી યુનિવર્સિટીમાં છેલ્લા એક મહિનાની ટૂંકી અંદર બે વિદ્યાર્થીઓ દ્વારા આત્મહત્યા કરી લેવામાં આવવાની ગંભીર ઘટના સામે આવી છે. આ દુર્ઘટનાને લઈને વિદ્યાર્થીઓમાં અને યુવા સંગઠનોમાં ભારે રોષ જોવા મળી રહ્યો છે. યુનિવર્સિટી વહીવટી તંત્રની બેદરકારી સામે અવાજ ઉઠાવવા માટે અખિલ ભારતીય વિદ્યાર્થી પરિષદ (ABVP) ના કાર્યકર્તાઓ દ્વારા કેમ્પસમાં વિરોધ પ્રદર્શનનું આયોજન કરવામાં આવ્યું હતું.

મુખ્ય બિલ્ડિંગ સુધી પહોંચવાનો પ્રયાસ

વિરોધ પ્રદર્શન ઉગ્ર બનતા ABVPના હોદ્દેદારો અને કાર્યકર્તાઓએ યુનિવર્સિટીનો કોલેજ ગેટ બળપૂર્વક ખોલીને અંદર પ્રવેશ કર્યો હતો અને મુખ્ય બિલ્ડિંગ સુધી પહોંચવાનો પ્રયાસ કર્યો હતો. આ સ્થિતિને કાબૂમાં લેવા માટે યુનિવર્સિટી કેમ્પસમાં ચુસ્ત પોલીસ બંદોબસ્ત ગોઠવી દેવામાં આવ્યો હતો, જેથી કોઈ અનિચ્છનીય બનાવ ન બને.

પોલીસ દ્વારા બળપ્રયોગ અને અટકાયત

વિરોધ કરી રહેલા વિદ્યાર્થીઓ અને પોલીસ વચ્ચે તણાવપૂર્ણ સ્થિતિ સર્જાઈ હતી. ABVP કાર્યકર્તાઓએ આક્ષેપ કર્યો હતો કે, પોલીસે તેમની સામે ભારે બળપ્રયોગ કર્યો હતો. પરિસ્થિતિ વણસતા પોલીસે કાયદો અને વ્યવસ્થા જાળવવા માટે અખિલ ભારતીય વિદ્યાર્થી પરિષદના અસંખ્ય હોદ્દેદારો અને કાર્યકર્તાઓની અટકાયત કરી હતી.

વહીવટી તંત્ર સામે સવાલો

એક જ મહિનામાં બે-બે વિદ્યાર્થીઓ આત્મહત્યા જેવા પગલાં ભરવા મજબૂર બનતા યુનિવર્સિટીની સુરક્ષા, કાઉન્સિલિંગ અને આંતરિક વ્યવસ્થા સામે મોટા સવાલો ઉભા થયા છે. સમગ્ર મામલે જવાબદારો સામે કડક કાર્યવાહીની માગ સાથે વિદ્યાર્થી સંગઠનોનું આંદોલન વધુ ઉગ્ર બની રહ્યું છે.

આ પણ વાંચો: Rajkot-Morbi હાઈવે પર કરુણાંતિકા, મારવાડી યુનિવર્સિટીના ત્રીજા માળેથી નીચે પટકાતા યુવકનું કરૂણ મોત