રાજકોટ જિલ્લાના અગ્રણી ઔદ્યોગિક વિસ્તાર ગણાતા મેટોડા જીઆઈડીસી સ્થિત પ્રખ્યાત 'જ્યોતિ સીએનસી' (Jyoti CNC) કંપનીની ફેક્ટરીમાં સવારના સમયે અચાનક આગ લાગવાની ઘટના સામે આવી હતી. ફેક્ટરીના પરિસરમાંથી ધુમાડાના ગોટેગોટા નીકળતા જોઈને સ્થળ પર હાજર કર્મચારીઓ અને આસપાસના એકમોમાં ભારે અફરાતફરી મચી ગઈ હતી. જોકે, ફાયર બ્રિગેડની ટીમે સમયસર પહોંચીને કામગીરી હાથ ધરતાં મોટી હોનારત ટળી હતી.
એસેમ્બલિંગ યુનિટમાં આગ: વોટર કેનન વડે કાબૂ મેળવાયો
આગ કંપનીના મુખ્ય એસેમ્બલિંગ યુનિટમાં લાગી હતી. બનાવની જાણ થતાં જ ફાયર બ્રિગેડનો કાફલો તાત્કાલિક ઘટનાસ્થળે દોડી ગયો હતો. ફાયર ફાઈટરોએ સતત પાણીનો મારો ચલાવીને કલાકોની ભારે જહમત બાદ આગ પર સંપૂર્ણ કાબૂ મેળવી લીધો હતો. સદનસીબે આગ વધુ પ્રસરે તે પહેલાં જ તેના પર નિયંત્રણ મેળવી લેવાતાં ફેક્ટરીના અન્ય વિભાગો સુરક્ષિત રહ્યા હતા અને મોટો અકસ્માત અટક્યો હતો.