રાજકોટ શહેરમાં નાગરિકોના સ્વાસ્થ્ય સાથે ચેડાં કરતા ખાણીપીણીના ધંધાર્થીઓ સામે મ્યુનિસિપલ કોર્પોરેશનના આરોગ્ય વિભાગની ફૂડ શાખાએ કડક ઝુંબેશ શરૂ કરી છે. શહેરના વિવિધ વિસ્તારોમાં આવેલા 38 જેટલા ખાણીપીણીના વેપારીઓને ત્યાં સરપ્રાઈઝ ચેકિંગ હાથ ધરવામાં આવ્યું હતું. આ કામગીરી દરમિયાન આરોગ્ય માટે હાનિકારક અને વાસી એવો 147 kg અખાદ્ય જથ્થો ઝડપાઈ જતાં તેને સ્થળ પર જ નાશ કરવામાં આવ્યો હતો. મનપાની આ આકસ્મિક કાર્યવાહીથી બેદરકાર વેપારીઓમાં ભારે ફફડાટ વ્યાપી ગયો છે.
નિર્મલા રોડ પર 'દેવ ફાસ્ટ ફૂડ' સીલ
ચેકિંગ દરમિયાન નિર્મલા રોડ પર આવેલા જાણીતા 'દેવ ફાસ્ટ ફૂડ' નામના એકમમાં ચોંકાવનારી ગંદકી સામે આવી હતી. મનપાની ટીમે જ્યારે તપાસ કરી ત્યારે સ્ટોરેજ એરિયા અને ફ્રિજની અંદર અખાદ્ય વસ્તુઓની સાથે વંદા, જીવજંતુઓ અને ઉંદરો જોવા મળ્યા હતા. ગ્રાહકોના સ્વાસ્થ્ય સાથે ખુલ્લેઆમ રમત રમાતી હોવાનું માલૂમ પડતાં જ ફૂડ વિભાગે ક્ષણનો પણ વિલંબ કર્યા વગર દેવ ફાસ્ટ ફૂડને તાત્કાલિક અસરથી સીલ કરી દીધું હતું.