રાજકોટ મહાનગરપાલિકા સંચાલિત શિક્ષણ સમિતિની ચૂંટણીને લઈને રાજકીય ગરમાવો આવી ગયો છે. શિક્ષણ સમિતિના કુલ 12 સદસ્યો પૈકી ભાજપ દ્વારા 11 ઉમેદવારોના નામોની સત્તાવાર જાહેરાત કરવામાં આવી છે. ભાજપના શહેર પ્રમુખ માધવ દવેએ એક યોજેલી પત્રકાર પરિષદમાં આ નામો જાહેર કર્યા હતા. ભાજપના આ તમામ 11 ઉમેદવારો વિજય મુહૂર્તમાં પોતાના ઉમેદવારી ફોર્મ ભરશે. બીજી તરફ કોંગ્રેસ પક્ષ દ્વારા શિક્ષણ સમિતિ માટે પોતાના કાર્યકર્તા હાજીભાઇ ઓડિયાને ઉમેદવાર તરીકે મેદાનમાં ઉતારવામાં આવ્યા છે.
શિક્ષિત ઉમેદવારો અને કાર્યકરોને પ્રાધાન્ય
શિક્ષણ સમિતિના ઉમેદવારોની પસંદગી અંગે વિગતો આપતાં શહેર પ્રમુખ માધવ દવેએ જણાવ્યું હતું કે, પક્ષમાં કાર્યકર્તાઓની અપેક્ષાઓ ઘણી વધારે હોય છે, પરંતુ પક્ષના મોવડી મંડળ દ્વારા તમામ પાસાંઓની ઊંડાણપૂર્વક વિચારણા કરીને નિર્ણય લેવાયો છે. શિક્ષણ સમિતિ માટે ઉચ્ચ શૈક્ષણિક લાયકાત ધરાવતા અને પક્ષ માટે સતત સક્રિય રહેલા નિષ્ઠાવાન કાર્યકર્તાઓને પ્રાધાન્ય આપવામાં આવ્યું છે. 12 સદસ્યોની આ સમિતિમાં 11 બેઠકો ભાજપ અને 1 બેઠક કોંગ્રેસના ઉમેદવાર વચ્ચે વહેંચાયેલી છે.