રાજકોટ શહેરના માલવિયાનગર પોલીસ સ્ટેશન વિસ્તાર હેઠળ આવેલા ઉમાકાંત પંડિત રોડ પર જાહેરમાં હિંસક મારામારીની ઘટના સામે આવી છે. માહિતી અનુસાર, ત્યાં રહેતા પરપ્રાંતિય પરિવારના સભ્યો વચ્ચે કોઈ કૌટુંબિક કે પારિવારિક બાબતે ઉગ્ર બોલાચાલી શરૂ થઈ હતી. સામાન્ય સવાલ-જવાબમાંથી શરૂ થયેલો આ કૌટુંબિક કલેશ જોતજોતામાં રસ્તા પર ઉગ્રે રૂપ ધારણ કરી ગયો હતો અને પરિવારના લોકો જાહેર રોડ પર સામસામે આવીને છૂટા હાથની મારપીટ કરવા લાગ્યા હતા.
લોકો તમાશો જોઈ મોબાઈલમાં વીડિયો ઉતારતા રહ્યા
આ જાહેર મારામારી દરમિયાન ઝઘડો એટલો વધી ગયો હતો કે એક ઉશ્કેરાયેલી મહિલાએ જમીન પરથી મોટો પથ્થર ઉપાડીને યુવક પર ઘા કરી તેને માર મારવાનું શરૂ કર્યું હતું. આશ્ચર્યજનક વાત એ છે કે જાહેર રસ્તા પર બની રહેલી આ હિંસક ઘટના વખતે આસપાસથી પસાર થતા સ્થાનિક લોકો ઝઘડો છોડાવવા આગળ આવવાના બદલે તમાશો જોતા રહ્યા હતા અને પોતાના મોબાઈલમાં વીડિયો ઉતારતા નજરે પડ્યા હતા.