સાબરકાંઠામાં ભારે વરસાદ ખાબક્યો. ધોધમાર વરસાદને પગલે હિમંતનગરમાં હાથમતી નદીના જળસ્તરમાં વધારો જોવા મળ્યો. હાથમતી નદીનું ઘણા વર્ષો બાદ રૌદ્રસ્વરૂપ જોવા મળ્યું. છેલ્લા કેટલાક દિવસોથી ભારે વરસાદના કારણે હિંમતનગર હાથમતી નદી પરના કોઝવે પર પણ પાણી ફરી વળ્યા. કોઝવે પરથી પસાર થવાનું યુવાનોને ભારે પડ્યું. 3 લોકો કોઝવે પરથી પસાર થતા હાથમતી નદીમાં તણાયા.
કોઝવે પરથી પસાર થતા 3 લોકો નદીમાં તણાયા
હિંમતનગરમાં હાથમતી નદી પર મહેતાપુરા પોલોગ્રાઉન્ડને જોડતા કોઝવે પરથી આ ત્રણ લોકો પસાર થઈ રહ્યા હતા. કોઝવે પરથી બે યુવકો અને એક મહિલા જોખમી રીતે પસાર થતા પાણીના પ્રવાહમાં ખેંચાયા અને ત્રણ લોકો નદીના પાણીમાં તણાયા. કોઝવે પર ત્રણ લોકો નદીમાં તણાતા સ્થાનિકોએ તુરંત તેમને બચાવવા પ્રયાસ કર્યો. દરમિયાન 2 યુવાનોને તરતા આવડતું હોવાથી તેઓ નદીના પાણીના ધસમસતા પ્રવાહમાંથી બહાર નીકળી શક્યા. જ્યારે તેમની સાથે એક મહિલા હતી તે નદીમાં તણાઈ. મહિલા તણાતા આસપાસના લોકો દોડી આવ્યા છતાં મહિલાને બચાવી ન શક્યા.
