સુરત શહેરમાં ગેરકાયદેસર દારૂની હેરાફેરી સામે પોલીસે લાલ આંખ કરી છે. સુરતના લસકાણા પોલીસ સ્ટેશનની ટીમે ગુપ્ત બાતમીના આધારે દરોડો પાડીને વિદેશી દારૂના મોટા જથ્થા સાથે ત્રણ ઈસમોને રંગેહાથ ઝડપી પાડ્યા છે. પોલીસે ચોક્કસ વ્યૂહરચના ગોઠવીને દારૂનું કટિંગ કે હેરાફેરી થાય તે પહેલાં જ ત્રણેય આરોપીઓને દબોચી લીધા હતા અને તેમની વિરુદ્ધ કાયદેસરની તપાસ હાથ ધરી છે.
પોલીસે રૂ.3.42 લાખનો દારૂ અને ગાડી કરી જપ્ત
પોલીસ દ્વારા કરવામાં આવેલી આ સફળ કામગીરીમાં રૂ.3,42,223ની કિંમતનો વિદેશી દારૂનો જથ્થો જપ્ત કરવામાં આવ્યો છે. આ ઉપરાંત, દારૂની હેરાફેરી માટે ઉપયોગમાં લેવાયેલી ચારચક્ર વાહન (ગાડી) તેમજ આરોપીઓ પાસેથી મળેલા મોબાઈલ ફોન પણ કબ્જે કરવામાં આવ્યા છે. આમ, લસકાણા પોલીસે દારૂ, વાહન અને મોબાઈલ સહિત કુલ રૂ.14,42,223નો મુદ્દામાલ જપ્ત કરીને બૂટલેગરો સામે મોટી કાર્યવાહી કરી છે.