સુરત શહેરના કવાસ વિસ્તારમાં એક અત્યંત કરુણ અને હૃદયદ્રાવક અકસ્માતની ઘટના સામે આવી છે. કવાસ વિસ્તારમાં પોતાના ઘર પાસે નિરાંતે રમી રહેલા અબુધ ૩ વર્ષના માસૂમ બાળકને પૂરઝડપે આવી રહેલા એક ટ્રેલરે અડફેટે લીધો હતો. બાળક જ્યારે ઘર નજીક રમી રહ્યો હતો ત્યારે અચાનક આવેલ ભારે વાહનના ચાલકે બેદરકારીપૂર્વક વાહન હંકારીને બાળકને કચડી નાખતાં ગંભીર અકસ્માત સર્જાયો હતો.
સારવાર દરમિયાન માસૂમનું મોત, પરિવારમાં શોકનું મોજું
અકસ્માત સર્જાતાં જ આસપાસના લોકો તાત્કાલિક સ્થળ પર દોડી આવ્યા હતા અને ગંભીર રીતે ઘવાયેલા બાળકને સારવાર અર્થે નજીકની હોસ્પિટલમાં ખસેડવામાં આવ્યો હતો. જોકે, ટ્રેલરની ટક્કર એટલી ભયાનક હતી કે બાળકને ગંભીર ઈજાઓ પહોંચી હતી, જેના કારણે સારવાર દરમિયાન માસૂમ બાળકે દમ તોડી દીધો હતો. બાળકના કરુણ મોતથી પરિવાર પર આભ તૂટી પડ્યું છે અને પરિવારજનોનું હૃદયફાટ રુદન જોઈને ઉપસ્થિત સૌ કોઈની આંખો ભીની થઈ ગઈ હતી.