Surat: અમરોલી પોલીસે ગેરકાયદેસર ફટાકડા વેચનારાની દિવાળી સુધારી, 8.59 લાખનો જથ્થો ઝડપી પાડ્યો

દિવાળીના તહેવારને અનુલક્ષીને સુરત પોલીસે ગેરકાયદેસર પ્રવૃત્તિઓ પર તવાઈ બોલાવતા અમરોલી પોલીસે એક મોટી સફળતા મેળવી છે. પોલીસે ફાયર સેફ્ટીના નિયમોનું ઉલ્લંઘન કરીને રહેણાંક વિસ્તારમાં રાખવામાં આવેલો રૂપિયા 8.59 લાખની કિંમતનો ગેરકાયદેસર ફટાકડાનો જથ્થો ઝડપી પાડ્યો છે. આ કેસમાં પોલીસે મનોજ ચતુરભાઈ દેવીપૂજક સહિત એક મહિલા અને એક પુરુષ એમ કુલ બે વ્યક્તિઓની ધરપકડ કરી છે.

ગેરકાયદેસર ફટાકડાનો જથ્થો ઝડપી પાડ્યો

પોલીસને મળેલી બાતમીના આધારે અમરોલી પોલીસે કાર્યવાહી કરી હતી. તપાસ દરમિયાન, આરોપી મનોજ દેવીપૂજક દ્વારા કોઈપણ પ્રકારની ફાયર NOC, સર્ટીફીકેટ કે પરમીટ વગર ફટાકડાનું વેચાણ કરવામાં આવતું હોવાનું બહાર આવ્યું હતું. પોલીસે બે અલગ-અલગ બિલ્ડિંગોના પાંચ જુદા-જુદા ફ્લેટમાંથી મોટા પ્રમાણમાં આ ફટાકડાનો જથ્થો જપ્ત કર્યો હતો, જે ગેરકાયદેસર રીતે ફાયર સેફ્ટી વગર સંગ્રહવામાં આવ્યો હતો.

ફટાકડાનો ફાયર સેફ્ટી વગર સંગ્રહવામાં આવ્યો

આટલો મોટો જથ્થો જપ્ત થતાં તેને પોલીસ સ્ટેશનમાં લાવવામાં આવતા આખું પોલીસ સ્ટેશન ફટાકડાથી ભરાઈ ગયું હતું. રહેણાંક વિસ્તારમાં આટલા મોટા પ્રમાણમાં જ્વલનશીલ વસ્તુનો સંગ્રહ કરવો એ લોકોના જીવ જોખમમાં મૂકવા સમાન છે. આ ઘટના બાદ કાપોદ્રા વિસ્તારમાં પણ રહેણાંક વિસ્તારમાં ગેરકાયદેસર ફટાકડાના ગોડાઉન હોવાની આશંકા ઊભી થઈ છે, જેના પગલે પોલીસ દ્વારા તે દિશામાં પણ તપાસ શરૂ કરવામાં આવી છે. અમરોલી પોલીસે હવે ઝડપાયેલા આરોપી મનોજ દેવીપૂજક પાસેથી આ ફટાકડાનો મુખ્ય સપ્લાયર કોણ હતો અને આ જથ્થો ક્યાંથી લાવવામાં આવ્યો હતો તે અંગે વધુ તપાસ શરૂ કરી છે. રહેણાંક વિસ્તારોમાં આવા જોખમી ગોડાઉનો પર પોલીસની આ કાર્યવાહી સરાહનીય છે.