સુરત શહેરમાં ભારે વરસાદ બાદ પૂરની સ્થિતિ હળવી થતાં જ હવે રોગચાળો ફાટી ન નીકળે તે માટે સુરત મહાનગરપાલિકા (SMC) ના આરોગ્ય વિભાગે કમર કસી છે. મનપા દ્વારા પ્રભાવિત વિસ્તારોમાં યુદ્ધના ધોરણે સફાઈ અને આરોગ્ય લક્ષી કામગીરી શરૂ કરી દેવામાં આવી છે. શહેરીજનોના સ્વાસ્થ્યની સુખાકારી માટે તંત્ર દ્વારા ઠેર-ઠેર ખાસ મેડિકલ કેમ્પ અને મોટા પાયે સર્વેલન્સની કામગીરી હાથ ધરવામાં આવી રહી છે.
લાખો ઘરોમાં સર્વેલન્સ અને ક્લોરિન-ORS નું વિતરણ
વરસાદી માહોલ બાદ પાણીજન્ય અને મચ્છરજન્ય રોગો અટકાવવા માટે અત્યાર સુધીમાં શહેરના આશરે 1.67 લાખ ઘરોમાં સઘન સર્વેલન્સ હાથ ધરવામાં આવ્યું છે. રોગચાળા સામે રક્ષણ મેળવવા માટે મનપાની ટીમો દ્વારા 2.22 લાખ લોકોને ક્લોરિન ટેબ્લેટ અને 53 હજારથી વધુ લોકોને ઓઆરએસ (ORS) ના પેકેટનું વિતરણ કરવામાં આવ્યું છે. પીવાના પાણીના શુદ્ધિકરણ અને કટોકટીના સમયે ઓઆરએસ ખૂબ જ ઉપયોગી સાબિત થઈ રહ્યું છે.