સુરત શહેરના વેડ રોડ વિસ્તારમાં મોબાઈલ ફોનની લતે વધુ એક માસૂમ બાળકનો જીવ લીધો છે. પાલિકાની શાળા નંબર 331માં ધોરણ-7માં અભ્યાસ કરતા 13 વર્ષીય માસૂમ બાળકે પોતાના જ ઘરમાં પંખા સાથે લટકીને જીવન ટૂંકાવી લીધું હતું. મૂળ ઓડિશાના વતની એવા શ્રમજીવી પરિવારનો આ એકનો એક લાડકવાયો દીકરો સતત મોબાઈલમાં મશગૂલ રહેતો હતો. ઘટનાના દિવસે માતા-પિતાએ માત્ર તેને મોબાઈલ ફોન બાજુ પર મૂકીને હોમવર્ક કરી લેવાનું કહ્યું હતું. આ સામાન્ય સલાહ બાળકને અસહ્ય રીતે માઠું લાગી આવતાં તેણે આ ખોફનાક પગલું ભરી લીધું હતું.
સ્ક્રીન એડિક્શને લીધો માસૂમનો જીવ
પરિવારજનોના જણાવ્યા અનુસાર, બાળકને લાંબા સમયથી મોબાઈલની ઘેરી લત વળગી હતી, જેના કારણે તેના મગજ પર ગંભીર નકારાત્મક અસરો થઈ હતી. સતત ગેમિંગ અને સ્ક્રીન ટાઈમના કારણે તેનો સ્વભાવ અત્યંત જિદ્દી અને ગુસ્સાવાળો બની ગયો હતો. નાની-નાની બાબતોમાં ચીડાઈ જવું અને પોતાની વાત મનાવવા જિદ્દે ચડવું તેની આદત બની ગઈ હતી. હોમવર્ક કરવાની નાની ટકોર પણ તેને એટલી ગંભીર લાગી કે તેણે ક્ષણિક આવેશમાં આવીને ફાંસો ખાઈ લીધો. ઘટના બાદ એકના એક પુત્રને ગુમાવતાં પરિવારમાં આક્રંદ અને અરેરાટી વ્યાપી ગઈ છે.