સુરત શહેરના સચિન વિસ્તારમાં આવેલી માસ્ટરમાઈન્ડ ઈંગ્લીશ સ્કૂલના લીઝ ડોક્યુમેન્ટમાં ચેડાં કરીને બોગસ ભાડા કરાર રજૂ કરવાના ગંભીર મામલે સચિન પોલીસે કાર્યવાહી કરીને મહિલા સહિત ત્રણ આરોપીઓની ધરપકડ કરી છે. પ્રાપ્ત વિગતો મુજબ, આરોપીઓએ ભાડા કરારના મૂળ લીઝ ડોક્યુમેન્ટમાં ૯ વર્ષના સમયગાળાને બદલે ૧૫ વર્ષની લીઝ દર્શાવીને ગેરરીતિ આચરી હતી. દસ્તાવેજોમાં ચેડાં કરીને ખોટી વિગતો ઊભી કરવાની આ ઘટના સામે આવતા શિક્ષણ અને મિલકત સંબંધિત બાબતોમાં ચકચાર મચી ગઈ છે.
ટ્રસ્ટની મંજૂરી વિના સ્કૂલ શરૂ કર્યાનો આરોપ
તપાસ દરમિયાન એવી વિગતો પણ બહાર આવી છે કે ટ્રસ્ટના સત્તાધિકૃત હોદ્દેદારોની પૂર્વ મંજૂરી મેળવ્યા વિના જ મિલકતનો ઉપયોગ કરવામાં આવ્યો હતો. હોદ્દેદારોની સંમતિ વગર જ મિલકતનો ઉપયોગ કરીને માસ્ટરમાઈન્ડ એજ્યુકેશન સ્કૂલ શરૂ કરી દેવામાં આવી હતી, જે નિયમો અને ટ્રસ્ટની કાર્યવાહી વિરુદ્ધ હોવાનું સામે આવ્યું છે. આ મામલે કાયદેસરની ફરિયાદ અને પુરાવાના આધારે પોલીસે તપાસનો દોર આગળ ધપાવ્યો હતો.
