ગુજરાતભરમાં આદ્યશક્તિની આરાધનાના મહાપર્વ નવરાત્રિ મહોત્સવનો આજથી ઉત્સાહભેર પ્રારંભ થઈ ચૂક્યો છે. જો કે, સુરત શહેરમાં ગરબા આયોજકો માટે આ પર્વ શરૂઆતથી જ મુશ્કેલીઓ લઈને આવ્યો છે. સુરત શહેરમાં મોટા પાયે ગરબાનું આયોજન કરનાર આયોજકોને પોલીસ અને વહીવટી તંત્ર તરફથી મંજૂરી મેળવવામાં ભારે હાલાકીનો સામનો કરવો પડી રહ્યો છે, જેના કારણે ખેલૈયાઓમાં પણ ચિંતા જોવા મળી રહી છે.
84 આયોજકોએ કરી હતી અરજી, પરંતુ માત્ર 40 ને જ મળી મંજૂરી
પ્રાપ્ત વિગતો અનુસાર, સુરત શહેરમાં વિવિધ સ્થળોએ ગરબાના આયોજન માટે કુલ 84 જેટલા આયોજકોએ મંજૂરી માટે અરજી કરી હતી. સુરત પોલીસ અને ફાયર વિભાગ દ્વારા કડક સુરક્ષા અને સલામતીના માપદંડોની ચકાસણી બાદ અત્યાર સુધી માત્ર 40 આયોજકોને જ ગરબા યોજવા માટે સત્તાવાર મંજૂરી આપવામાં આવી છે. જ્યારે હજુ પણ બાકી રહેલા 44 આયોજકો ફાયર એનઓસી (NOC) અને પોલીસ પરવાનગી મેળવવા માટે દરવાજે દરવાજે ધક્કા ખાવા મજબૂર બન્યા છે.