સુરતમાં આગામી તહેવારો દરમિયાન શહેરમાં શાંતિ, સલામતી અને સુરક્ષાનું વાતાવરણ જાળવી રાખવાના હેતુથી સુરત પોલીસ એક્શન મોડમાં આવી ગઈ છે. તહેવારોના દિવસોમાં કાયદો અને વ્યવસ્થાની પરિસ્થિતિ કથળે નહીં તે માટે સુરત પોલીસના ઝોન ૨ વિસ્તાર હેઠળ આવતા વિવિધ પોલીસ સ્ટેશનો દ્વારા મોડી રાત્રે એકસાથે મેગા કોમ્બિંગ ઓપરેશન હાથ ધરવામાં આવ્યું હતું. તંત્રના આ અચાનક પગલાથી અસામાજિક તત્વોમાં ભારે ફાળ પડી ગઈ છે.
196 જેટલા ઇસમોને ઝડપી પાડી અટકાયત કરી
પોલીસ દ્વારા હાથ ધરવામાં આવેલા આ સઘન ચેકિંગ અભિયાન દરમિયાન ખાસ કરીને લીંબાયત, સારોલી, ગોડાદરા, ઉધના અને સલાબતપુરા જેવા વિસ્તારના સંવેદનશીલ પોઈન્ટ્સ પર નાકાબંધી કરીને તપાસ કરવામાં આવી હતી. આ મેગા કોમ્બિંગ દરમિયાન પોલીસે ભૂતકાળમાં ગુનાહિત ઇતિહાસ ધરાવતા અને શંકાસ્પદ જણાતા 196 જેટલા ઇસમોને ઝડપી પાડી તેમની અટકાયત કરી હતી.