સુરત શહેરના પાલ વિસ્તારમાં આવેલી ગાર્ડનિયા રો હાઉસ સોસાયટીમાં પોલીસ પરિવારની દાદાગીરીનો સનસનાટીભર્યો કિસ્સો સામે આવ્યો છે. સોસાયટીમાં રહેતા અને ગુનાહિત માનસિકતા ધરાવતા નરેશ ગઢવી (ઉર્ફે કુલચા) નામના વ્યક્તિએ કાર પાર્કિંગ અને સોસાયટીના મેન્ટેનન્સ બાબતે સામાન્ય વાતમાં ઉશ્કેરાઈને ભારે હોબાળો મચાવ્યો હતો. આ તકરાર દરમિયાન નરેશ ગઢવીએ સોસાયટીમાં જ રહેતા 77 વર્ષીય વયોવૃદ્ધ રહીશ અને તેમના પુત્ર પર જાનલેવા હુમલો કરી ઢોર માર માર્યો હતો, જેના પગલે વિસ્તારમાં અરેરાટી વ્યાપી ગઈ છે.
આરોપી નરેશ ગઢવીનો અગાઉ પણ વિવાદાસ્પદ ઇતિહાસ
સ્થાનિક રહીશોના જણાવ્યા મુજબ આરોપી નરેશ ગઢવી અગાઉ પણ અનેકવાર સોસાયટીના નાના-મોટા પ્રશ્નોમાં રહસ્યમય રીતે ધાક-ધમકી આપીને ધમાલ મચાવી ચૂક્યો છે. પોલીસ તંત્ર સાથેના જોડાણ કે ખાખી વર્ધીના રોફ તળે તે અવારનવાર સોસાયટીના રહીશોને હેરાન-પરેશાન કરતો હતો. વયોવૃદ્ધ નાગરિક પર થયેલા આ માનવતાહીન હુમલા બાદ સ્થાનિક લોકોમાં ભારે રોષ જોવા મળી રહ્યો છે અને આરોપીના અસમાજિક વર્તનને કારણે સોસાયટીના અન્ય પરિવારજનો પણ સતત ભયના ઓથાર હેઠળ જીવવા મજબૂર બન્યા છે.