સુરત શહેર અને આસપાસના ગ્રામ્ય વિસ્તારોમાં કિંમતી જમીનો પર નજર બગાડી બોગસ દસ્તાવેજોના આધારે જમીન પચાવી પાડતી ટોળકીઓ સામે સુરત પોલીસની આર્થિક ગુના નિવારણ શાખા (ઇકો સેલ) એ લાલ આંખ કરી છે. સચિન વિસ્તારમાં આવેલી અંદાજે ૨૧ વીઘા જેટલી મોકાની જમીનમાં વારસદાર બહેનોનો હક્ક ડૂબાડવા માટે તેમની બોગસ સહીઓ કરી બનાવટી કરાર ઊભા કરી જમીન હડપ કરવાના ચકચારી કેસમાં ઇકો સેલની ટીમે ત્રણ આરોપીઓને ઝડપી પાડ્યા છે.
વારસદાર બહેનોની ખોટી સહીઓ અને બોગસ કરારનો ખેલ
પોલીસ તપાસમાં બહાર આવેલી વિગતો અનુસાર આરોપીઓએ પૂર્વઆયોજિત કાવતરું ઘડી જમીન પચાવવાનો પ્રયાસ કર્યો હતો. સચિન વિસ્તારમાં આવેલી 21 વીઘા કિંમતી જમીનમાં કાયદેસરની વારસદાર બહેનોના હક્ક અને અધિકારો છીનવી લેવા માટે તાગડો રચવામાં આવ્યો હતો.આરોપીઓએ બહેનોની જાણ બહાર તેમના નામે ખોટી સહીઓ કરી તેમજ બોગસ લખાણો અને બનાવટી કરારો તૈયાર કર્યા હતા.આ બનાવટી દસ્તાવેજોને સરકારી દફતરે કે સત્તાવાર રીતે સાચા તરીકે રજૂ કરી કરોડો રૂપિયાની જમીન પોતાના નામે ચડાવી લેવાનો કારસો રચાયો હતો.
સચિન પોલીસ મથકે નોંધાયો હતો ગુનો, બાદમાં ઇકો સેલને સોંપાઈ તપાસ
સમગ્ર છેતરપિંડીની જાણ ભોગ બનનાર પરિવારને થતાં કાયદાકીય લડત શરૂ થઈ હતી. બનાવ અંગે સચિન પોલીસ મથકમાં બનાવટી દસ્તાવેજો બનાવવા, છેતરપિંડી અને ગુનાહિત કાવતરું ઘડવા સહિતની કલમો હેઠળ ફરિયાદ નોંધાઈ હતી.મામલો આર્થિક ગેરરીતિ અને જમીનના મોટા કૌભાંડ સાથે જોડાયેલો હોવાથી સમગ્ર કેસની ઊંડાણપૂર્વકની તપાસ સુરત ક્રાઈમ બ્રાન્ચની ઇકો સેલ ને સોંપવામાં આવી હતી.
ઇકો સેલ દ્વારા ત્રણ આરોપીઓની સત્તાવાર ધરપકડ
ઇકો સેલની ટીમે ટેકનિકલ અને દસ્તાવેજી પુરાવાઓની ઝીણવટભરી તપાસ બાદ મુખ્ય આરોપીઓની ધરપકડ કરી છે. પોલીસે જસવંતસિંહ, વિક્રમસિંહ અને અન્ય એક વિક્રમસિંહ નામના ત્રણેય આરોપીઓને સકંજામાં લઈ લીધા છે.આરોપીઓએ તૈયાર કરેલા બોગસ કરારો, દસ્તાવેજો અને બનાવટી સહીઓના સેમ્પલ એફએસએલ (FSL) ચકાસણી માટે મોકલવાની તજવીજ હાથ ધરાઈ છે.આ કૌભાંડમાં કોઈ સરકારી કર્મચારી કે અન્ય વચેટિયાઓની સંડોવણી છે કે કેમ તે દિશામાં પણ પોલીસે રિમાન્ડ મેળવી આગળની તપાસ તેજ કરી છે.
આ પણ વાંચો: Mehsana: બહુચરાજીમાં ગંજીપાના પર પૈસાની બાજી લગાવતા સરપંચ સહિત 3 શખ્સો જેલના સળિયા પાછળ, 7 ફરાર આરોપીઓની શોધખોળ
