સુરત શહેરમાંથી કાયદો અને વ્યવસ્થાની સ્થિતિ તેમજ દારૂબંધીના કડક અમલના દાવાઓની પોલ ખોલતો એક અત્યંત ગંભીર કિસ્સો સામે આવ્યો છે. સુરતના પીપલોદ રોડ પર આવેલા પ્રખ્યાત મૈસુર કાફે પાસે મોડી રાત્રે હજારો નાગરિકોની હાજરી વચ્ચે એક ભયાનક અકસ્માત સર્જાયો હતો. અકસ્માત સર્જનાર બીજું કોઈ નહીં પરંતુ કાયદાનું પાલન કરાવવાની જવાબદારી જેના માથે છે તેવા સુરત પોલીસના આસિસ્ટન્ટ સબ-ઇન્સ્પેક્ટર (ASI) અજય એચ. પટેલ હોવાનું સામે આવ્યું છે. ASI એટલો દારૂ પીધેલો હતો કે તેનાથી પોતાની કાર પણ કંટ્રોલ થઈ રહી નહોતી અને તેણે પૂરપાટ ઝડપે કાર સિટી બસમાં ઘુસાડી દીધી હતી.
કાર બની ગઈ હતી ચાલતી બાર, વર્ધી પણ અંદરથી મળી
અકસ્માત થતાં જ આસપાસના સ્થાનિક લોકો અને વાહનચાલકો તાત્કાલિક મદદ માટે દોડી આવ્યા હતા. જો કે, જ્યારે લોકોએ કાર ચાલકને બહાર કાઢ્યો ત્યારે તે પોલીસકર્મી અજય પટેલ નશામાં ધૂત હાલતમાં લથડિયાં ખાઈ રહ્યો હતો. રોષે ભરાયેલા લોકોએ જ્યારે કારની અંદર તપાસ કરી તો તેઓ પણ ચોંકી ઉઠ્યા હતા. કારની અંદરથી વિદેશી દારૂની બોટલ, પીવા માટેના કાચના ગ્લાસ અને અન્ય સામગ્રી મળી આવી હતી. એટલું જ નહીં, ગાડીની પાછલી સીટ પરથી પોલીસની સત્તાવાર વર્ધી, બેલ્ટ, બક્કલ નંબર અને 'અજય એચ. પટેલ' લખેલી નેમપ્લેટ મળી આવી હતી. લોકોએ આ નશાખોર પોલીસકર્મીને પકડીને મેથીપાક આપ્યા બાદ તાત્કાલિક ઉમરા પોલીસને હવાલે કર્યો હતો.
