દેશભરમાં સ્વચ્છતા અને શ્રેષ્ઠ ઇન્ફ્રાસ્ટ્રક્ચર માટે એવોર્ડ જીતનારી સુરત મહાનગરપાલિકા (SMC) ના સુશાસનના દાવાઓની પોલ પીવાના પાણીની મૂળભૂત સુવિધામાં જ ખુલ્લી પડી ગઈ છે. સુરત શહેરના વિવિધ વિસ્તારોમાં છેલ્લા ઘણા દિવસોથી ઘરોમાં પીળું, ડહોળું અને અત્યંત દુર્ગંધયુક્ત પીવાનું પાણી સપ્લાય થઈ રહ્યું છે. હજુ તાજેતરમાં જ ચોમાસું પૂર્ણ થયું હોવા છતાં અને તાપી નદી પરનો સિંગણપોર કોઝવે સતત ઓવરફ્લો રહ્યો હોવા છતાં નાગરિકોને શુદ્ધ પાણી નસીબ થઈ રહ્યું નથી. પીવાના પાણીના નામે રોગચાળો વહેંચાઈ રહ્યો હોવાથી સ્થાનિક રહીશોમાં પાલિકા તંત્ર સામે ભારે રોષ ફાટી નીકળ્યો છે. આ ગંભીર લોકપ્રશ્ને હવે શાસક પક્ષે પણ ક્ષતિ સ્વીકારી છે, પરંતુ ઉકેલ લાવવાને બદલે લોકોને ‘પાણી ઉકાળીને પીવાની’ સલાહ આપી હાથ ખંખેરવાનો પ્રયાસ કરવામાં આવી રહ્યો છે.

નળમાંથી પીળું અને વાસ મારતું પાણી

શહેરના મોટાભાગના રહેણાંક વિસ્તારોમાં સવાર-સાંજ અપાતા સપ્લાયમાં પીળા રંગનું ગંદુ પાણી આવી રહ્યું છે, જેમાંથી અસહ્ય વાસ આવે છે.આ દૂષિત પાણી વાપરવા કે પીવાલાયક ન હોવા છતાં ગરીબ અને મધ્યમવર્ગીય પરિવારો તેને પીવા માટે મજબૂર બન્યા છે.ગંદા પાણીના સતત વપરાશથી ઝાડા, ઉલટી, ટાઇફોઇડ, કમળો અને ચામડીના રોગો જેવા જીવલેણ રોગચાળો વકરવાની ગંભીર ભીતિ સેવાઈ રહી છે.લોકોનો સીધો સવાલ છે કે મોંઘા વોટર ટેક્સ અને સફાઈ વેરો વસૂલ્યા પછી પણ પાલિકા ફિલ્ટર કર્યા વગરનું પાણી કેમ વિતરણ કરી રહી છે?

ઓછા વરસાદ અને જળકુંભીનું બહાનું

તંત્ર અને શાસકો દ્વારા એવો લૂલો બચાવ કરવામાં આવી રહ્યો છે કે ઉપરવાસમાં ઓછો વરસાદ પડવાના કારણે કોઝવેમાં પાણીનું લેવલ ઘટી ગયું છે, જેના લીધે તાપી નદીમાં લીલ અને જળકુંભી વધી ગઈ છે અને પાણી ગંદું આવી રહ્યું છે.જોકે, સુરતીઓ આ તર્ક સામે રોષ ઠાલવી રહ્યા છે કારણ કે હજુ થોડા દિવસો પહેલાં જ ચોમાસાની સિઝનમાં સિંગણપોર કોઝવે ૬ મીટરથી વધુ સપાટીએ સતત ઓવરફ્લો વહી રહ્યો હતો.પાણીનો પૂરતો જથ્થો હોવા છતાં પાલિકાના વોટર ટ્રીટમેન્ટ પ્લાન્ટ્સ (WTP) દ્વારા પાણીને યોગ્ય રીતે ક્લોરિનેશન અને ફિલ્ટર કેમ કરવામાં નથી આવતું તે મુદ્દે તંત્ર મૌન સેવી રહ્યું છે.

શાસક પક્ષે સમસ્યા સ્વીકારી: ‘ઉકાળીને પીવો’ની અજીબ સલાહ

ભારે હોબાળો મચતાં આખરે SMC શાસક પક્ષના નેતાએ સત્તાવાર રીતે સ્વીકાર્યું છે કે શહેરમાં પીવાનું પાણી ગંદું આવી રહ્યું છે અને નાગરિકોની ફરિયાદ વ્યાજબી છે.આ મામલે મ્યુનિસિપલ કમિશનર સમક્ષ તાત્કાલિક ટેકનિકલ ખામી દૂર કરી શુદ્ધ પાણી વિતરણ કરવા રજૂઆત કરવામાં આવી છે.જોકે, તાત્કાલિક રાહત આપવાને બદલે પાલિકાએ નાગરિકોને એવી શિખામણ આપી છે કે જ્યાં સુધી સ્થિતિ સામાન્ય ન થાય ત્યાં સુધી રોગચાળાથી બચવા માટે મનપાનું પાણી ઉકાળીને અને ગાળીને જ પીવું.

આ પણ વાંચો: Gir Somnath: કોડીનારના પેઢાવાડા ગામે વાડી વિસ્તારમાં ઝૂંપડામાં સૂઈ રહેલા શ્રમિક પર દીપડાએ હુમલો કર્યો