સુરત શહેરના મોટા વરાછા વિસ્તારમાં આવેલા જાણીતા AR મોલમાં એક યુવતીની છેડતી કરવાની સનસનીખેજ ઘટના સામે આવી હતી. મોલમાં ખરીદી કે અન્ય કામ અર્થે આવેલી યુવતી સાથે એક યુવકે માનસિક વિકૃત હરકત કરીને છેડતી કરી હતી. આ સમગ્ર શરમનાક ઘટના મોલમાં લાગેલા CCTV કેમેરામાં કેદ થઈ ગઈ હતી. ઘટનાના વિડીયો ફૂટેજ સોશિયલ મીડિયા પર વાયરલ થતાં અને પોલીસ સુધી બાબત પહોંચતાં જ સમગ્ર વિસ્તારમાં ભારે ચકચાર મચી ગઈ હતી અને મહિલા સુરક્ષા સામે સવાલો ઊભા થયા હતા.
ઉત્તરાણ પોલીસે આરોપીને દબોચ્યો
બનાવની ગંભીરતાને ધ્યાને લઈને ઉત્તરાણ પોલીસ મથકની ટીમે તાત્કાલિક ધોરણે તપાસનો ધમધમાટ શરૂ કર્યો હતો. મોલના CCTV ફૂટેજની ઊંડાણપૂર્વક ચકાસણી કરીને પોલીસે આરોપીનું સગડ મેળવ્યું હતું. સીસીટીવીની મદદથી હાથ ધરાયેલી સઘન તપાસના આધારે ઉત્તરાણ પોલીસે ગણતરીના સમયમાં જ છેડતી કરનાર વિકૃત યુવકની ઓળખ કરી તેની અટકાયત કરી લીધી હતી. પોલીસની આ ઝડપી કાર્યવાહીથી અસામાજિક તત્વોમાં ફફડાટ વ્યાપી ગયો છે.
