સુરતના વિશ્વવિખ્યાત ડાયમંડ ઉદ્યોગમાંથી રત્ન કલાકારો અને વેપારીઓ માટે એક અત્યંત રાહત અને ખુશીના સમાચાર સામે આવ્યા છે. છેલ્લા કેટલાક સમયથી મંદીના માહોલમાંથી પસાર થઈ રહેલા હીરા ઉદ્યોગમાં લાંબા સમય બાદ ભારે ઉત્સાહ અને તેજી જોવા મળી રહી છે. પરિસ્થિતિની અનુકૂળતા અને ડાયમંડની વધતી માગને ધ્યાનમાં રાખીને ડાયમંડ એસોસિએશન દ્વારા દિવાળીના વેકેશન અંગે એક મોટો નિર્ણય લેવામાં આવ્યો છે, જેના કારણે વેપારીઓ અને રત્ન કલાકારોમાં આનંદની લહેર ફેલાઈ ગઈ છે.
છેલ્લા ચાર વર્ષ બાદ ઉદ્યોગમાં ઉભું થયું પોઝિટિવ વાતાવરણ
છેલ્લા ચાર વર્ષ પછી સુરતના ડાયમંડ ઉદ્યોગમાં ફરી એકવાર સકારાત્મક (પોઝિટિવ) વાતાવરણ ઊભું થયું છે. આંતરરાષ્ટ્રીય બજારમાં ભારતીય હીરાની માગ સતત વધી રહી છે. દેશ-વિદેશમાં નેચરલ રફ ડાયમંડથી લઈને લેબ-ગ્રોન (Lab-grown) ડાયમંડની પણ ભારે ડિમાન્ડ જોવા મળી રહી છે. આ વધતી માગને પહોંચી વળવા માટે કારખાનાઓમાં પૂરૂરું કામકાજ ચાલી રહ્યું છે, જેના કારણે પરંપરાગત વેકેશનના દિવસોમાં કાપ મૂકવાનો નિર્ણય કરાયો છે.