વિજયા દશમી એટલે કે દશેરાના પવિત્ર તહેવાર નિમિત્તે સુરતીઓ કરોડો રૂપિયાના ફાફડા અને જલેબી આરોગી જતા હોય છે. લોકોના સ્વાસ્થ્ય સાથે કોઈ ચેડાં ન થાય અને ભેળસેળયુક્ત ફરસાણ વેચાય નહીં તે હેતુથી સુરત મહાનગરપાલિકાના ફૂડ સેફ્ટી વિભાગ દ્વારા સરપ્રાઈઝ ચેકિંગ ઝુંબેશ હાથ ધરવામાં આવી છે. ઉધના-પાંડેસરા રોડ પર આવેલી જાણીતી ફરસાણની દુકાનો પર ફૂડ સેફ્ટી ઓફિસરોની ટીમે અચાનક દરોડા પાડીને તહેવાર નિમિત્તે વેચાતા ખાદ્યપદાર્થોની ગુણવત્તા ચકાસવાની પ્રક્રિયા શરૂ કરી છે.
બે દિવસ પહેલાં નમૂના લેવા પાછળનું ખાસ કારણ
સામાન્ય રીતે દશેરાના બે દિવસ પહેલાંથી જ ફરસાણના વેપારીઓ દ્વારા મોટા પ્રમાણમાં ફાફડા અને જલેબી બનાવવાની તૈયારીઓ શરૂ કરી દેવામાં આવતી હોય છે. આ સમયગાળા દરમિયાન તેલમાં કે લોટમાં કોઈ પ્રકારની ભેળસેળ કરવામાં આવે છે કે નહીં તે જાણવા માટે ફૂડ સેફ્ટી વિભાગે બે દિવસ અગાઉથી જ ફાફડા અને જલેબીના સેમ્પલ લેવાની કામગીરી હાથ ધરી છે. પાંડેસરાની દુકાનોમાંથી લેવામાં આવેલા આ નમૂનાઓને તાત્કાલિક પૃથક્કરણ માટે લેબોરેટરીમાં મોકલી આપવામાં આવ્યા છે.