સુરત ક્રાઈમ બ્રાન્ચે મોટી સફળતા મેળવીને કાપોદ્રા વિસ્તારમાં રૂ.65 લાખની માતબર રકમની છેતરપિંડી આચરી છેલ્લા દોઢ વર્ષથી નાસતા ફરતા મુખ્ય આરોપીને ઝડપી પાડ્યો છે. સુરત ક્રાઈમ બ્રાન્ચની ટીમે બાતમીના આધારે કાર્યવાહી કરીને આરોપી સાગર માધવજીભાઈ સુતરીયાને શહેરના સહારા દરવાજા વિસ્તારમાંથી દબોચી લીધો છે. આરોપીની અટકાયત કરીને આગળની કાયદેસરની કાર્યવાહી હાથ ધરવામાં આવી છે.
રોકાણના નામે લાખો રૂપિયા પડાવી ફરાર થયો હતો
પોલીસ તપાસમાં બહાર આવેલા તથ્યો મુજબ, આરોપી સાગર સુતરીયાએ ફરિયાદીઓ અને અન્ય લોકો પાસેથી ઇન્વેસ્ટમેન્ટ (રોકાણ) પર ઊંચા વળતરની લાલચ આપીને કટકે કટકે રૂ.65 લાખ જેટલી માતબર રકમ પડાવી લીધી હતી. નાણાં મેળવ્યા બાદ આરોપી રકમ પરત આપ્યા વિના રાતોરાત ફરાર થઈ ગયો હતો. આ સમગ્ર ઠગાઈ અંગે ભોગ બનનારાઓ દ્વારા કાપોદ્રા પોલીસ સ્ટેશનમાં છેતરપિંડી અને વિશ્વાસઘાતનો ગુનો નોંધાવવામાં આવ્યો હતો.