સુરત જિલ્લાના ગ્રામ્ય વિસ્તારોમાં તસ્કર ટોળકી ફરી એકવાર સક્રિય થતાં રહીશોમાં ભારે ફાળચો વ્યાપી ગયો છે. માંગરોળ તાલુકામાં આવેલા વાંકલ ગામની ‘વિશ્વાસ રેસિડેન્સી’માં તસ્કરોએ બંધ મકાનને નિશાન બનાવીને મોટી ચોરીને અંજામ આપ્યો છે. મકાનમાલિક પરિવાર સાંજના સમયે કામ અર્થે સુરત ગયો હતો, તે જ સમયગાળા દરમિયાન તસ્કરોએ તકનો લાભ ઉઠાવી મકાનમાં પ્રવેશ કર્યો હતો.
ઘરનો નકુચો તોડી લાખોની મત્તા ચોરાઈ
રાત્રિના સમયે તસ્કરોએ ઘરના મુખ્ય દરવાજાનો નકુચો તથા તાળું તોડીને અંદર પ્રવેશ કર્યો હતો. ઘરમાં મૂકેલી રોકડ રકમ તેમજ સોના-ચાંદીના કિંમતી ઘરેણાં સહિત કુલ રૂ.4 લાખથી વધુની મત્તા ચોરીને તસ્કરો આસાનીથી ફરાર થઈ ગયા હતા. પરિવારજનો પરત ફરતા ઘરનો સામાન વેરવિખેર જોઈને ચોરી થઈ હોવાની જાણ થઈ હતી.
