સુરત શહેરના ગીચ અને વેપારી વિસ્તાર ગણાતા ઝાંપા બજાર ખાતે એક મોટી દુર્ઘટના સામે આવી છે. ઝાંપા બજારમાં આવેલા તૈયાબી મોહલ્લામાં બુરહાની હોસ્પિટલ નજીકનું એક જૂનું અને જર્જરિત મકાન અચાનક ધડાકાભેર ધરાશાયી થઈ ગયું હતું. મકાનનો મોટો ભાગ અચાનક રસ્તા પર અને આસપાસના વિસ્તારમાં તૂટી પડતાં જ ધૂળના ગોટેગોટા ઉડ્યા હતા. ભરચક વિસ્તારમાં બનેલી આ ઘટનાના કારણે આસપાસના રહીશો અને રાહદારીઓમાં ક્ષણભર માટે ભારે અફરાતફરી અને ભયનો માહોલ સર્જાયો હતો.
સદનસીબે મોટી જાનહાનિ ટળી
મકાન ધરાશાયી થવાની આ ઘટનામાં સૌથી રાહતની વાત એ રહી છે કે સદનસીબે કોઈ જાનહાનિ નોંધાઈ નથી. ઘટના સમયે મકાનની અંદર કે તેની બિલકુલ નજીક કોઈ હાજર ન હોવાથી મોટી દુર્ઘટના ટળી ગઈ હતી. જોકે, મકાનનો કાટમાળ રસ્તા પર પથરાઈ જતાં વાહન વ્યવહાર અને લોકોની અવરજવર થોડા સમય માટે ખોરવાઈ ગઈ હતી. સ્થાનિક લોકોના જણાવ્યા મુજબ, મકાન લાંબા સમયથી જર્જરિત હાલતમાં હતું અને અચાનક ચોમાસા કે અન્ય કારણોસર કડડભૂસ થઈને તૂટી પડ્યું હતું.