સુરત જિલ્લાના કામરેજ તાલુકામાંથી ચોરીની એક મોટી ઘટના સામે આવી છે. કામરેજના અલુરા ગામે આવેલા પ્રખ્યાત 'વર્ધન ઇન્ડસ્ટ્રીયલ પાર્ક' માં તસ્કરોએ ત્રાટકીને ચોરીની ઘટનાને અંજામ આપ્યો છે. ઇન્ડસ્ટ્રીયલ પાર્કમાં આવેલી એક ફેક્ટરી/ઇન્ડસ્ટ્રીને નિશાન બનાવીને અજાણ્યા ચોરોએ લાખો રૂપિયાના માલમત્તાની ચોરી કરી હોવાની ફરિયાદ ઉઠતા સમગ્ર ઔદ્યોગિક વસાહતમાં ચિંતાનો માહોલ વ્યાપી ગયો છે.
કુલ રૂ.1.70 લાખની કિંમતના કેબલની ચોરી
મળતી માહિતી મુજબ, આ ચોરીની ઘટનાને 20 થી 25 વર્ષની ઉંમરના અજાણ્યા ઇસમોએ અંજામ આપ્યો છે. ઇન્ડસ્ટ્રીમાં અંદર મૂકેલા કિંમતી કેબલ તેમજ ફેક્ટરીમાં ફિટિંગ કરવા માટે નવા લાવવામાં આવેલા કેબલની તસ્કરોએ ઉઠાંતરી કરી હતી. ચોરી થયેલા સામાનમાં મોંઘા કોપર (તાંબાના) કેબલ અને સીસીટીવી (CCTV) ના વાયરિંગ કેબલનો સમાવેશ થાય છે. તસ્કરો કુલ રૂપિયા 1.70 લાખની કિંમતના કેબલની ચોરી કરીને પલાયન થઈ ગયા છે.