સુરત શહેરના ડિંડોલી વિસ્તારમાં આવેલા RJD પ્લાઝા હોટલમાં હૃદય કંપાવી દે તેવી એક ઘટના સામે આવી છે. હોટલના રિસેપ્શન કાઉન્ટર પર ઉભા રહીને વાતચીત કરી રહેલો એક યુવક અચાનક જ બેભાન થઈને જમીન પર ઢળી પડ્યો હતો. યુવક જમીન પર પતંગની જેમ ઢળી પડતાં હોટલ સ્ટાફ અને આસપાસ ઉભેલા લોકો સ્તબ્ધ થઈ ગયા હતા. તુરંત જ તેને સારવાર અર્થે ખસેડવાની તજવીજ હાથ ધરવામાં આવી હતી, પરંતુ હોસ્પિટલ પહોંચે તે પહેલાં જ તેનું મોત નીપજ્યું હતું.
લાઈવ મોતના સીસીટીવી ફૂટેજ સામે આવ્યા
આ સમગ્ર કાળજું કંપાવનારી ઘટના હોટલના રિસેપ્શન વિસ્તારમાં લાગેલા સીસીટીવી (CCTV) કેમેરામાં કેદ થઈ ગઈ હતી. CCTV ફૂટેજમાં જોઈ શકાય છે કે યુવક સામાન્ય રીતે વાત કરી રહ્યો હતો અને સેકન્ડોના જ ભાગમાં અચાનક જ તેને છાતીમાં કંઈક ઉપડ્યું હોય તેમ તે સીધો જમીન પર પટકાયો હતો. આ 'લાઈવ ડેથ'ના દ્રશ્યો સોશિયલ મીડિયા પર સામે આવતાં જ સમગ્ર સુરત શહેરમાં અરેરાટી સાથે ભારે સનસનાટી મચી ગઈ છે.