સુરત જિલ્લાના ઓલપાડથી કિમ તરફ જતા મુખ્ય માર્ગ પર એક સીએનજી (CNG) કારમાં અચાનક ભીષણ આગ લાગવાની ગંભીર ઘટના સામે આવી છે. સુરતથી હાંસોટ તરફ જઈ રહેલી કારમાં કોઈ અગમ્ય કારણોસર અચાનક આગ ભભૂકી ઊઠી હતી. જોતજોતામાં આગે સમગ્ર કારને પોતાની ચપેટમાં લઈ લેતાં માર્ગ પરથી પસાર થતાં અન્ય વાહનચાલકોમાં થોડા સમય માટે અફરાતફરી અને ભયનો માહોલ સર્જાયો હતો.
કારચાલકની સમયસૂચકતાથી જીવ બચ્યો
કારમાં ધુમાડા નીકળતાં અને આગ લાગતાં જ કારચાલકે અદભુત સમયસૂચકતા અને ત્વરિત બુદ્ધિશક્તિ વાપરી હતી. કારમાં સવાર ચાલકે તાત્કાલિક વાહન રોકીને સુરક્ષિત રીતે બહાર નીકળી જતાં તેનો આબાદ બચાવ થયો હતો. ચાલકના ઝડપી નિર્ણયના કારણે એક મોટી હોનારત ટળી ગઈ હતી અને કોઈ જાનહાનિ નોંધાઈ નહોતી.