Surat News: ઓલપાડના સાયણમાંથી 1.972 કિલો ગાંજા સાથે યુપીના ઈસમની ધરપકડ
સુરત જિલ્લાના ઓલપાડ તાલુકામાં આવેલા સાયણ વિસ્તારમાં પોલીસે નશીલા પદાર્થોની હેરાફેરી સામે કડક કાર્યવાહી કરી છે. સાયણના મોટા હળપતિ વાસમાં આવેલા જલારામ ફળિયામાં બાતમીના આધારે પોલીસે એક ભાડાના મકાન પર સફળ દરોડો પાડ્યો હતો. આ દરોડા દરમિયાન પોલીસે ઘરમાં છુપાવવામાં આવેલો 1.972 કિલો જેટલો બિનઅધિકૃત ગાંજાનો જથ્થો શોધી કાઢ્યો હતો. પોલીસની આ અચાનક કાર્યવાહીથી સ્થાનિક નશાના કારોબારીઓમાં ભારે ફફડાટ વ્યાપી ગયો છે.
આ સફળ કામગીરી દરમિયાન પોલીસે સ્થળ પરથી રૂ.98,000ની કિંમતનો ગાંજાનો જથ્થો જપ્ત કર્યો હતો. તેની સાથે જ પોલીસે મૂળ ઉત્તર પ્રદેશના ફતેહપુરના વતની એવા રામેશ્વર સિયમ્બર વિશ્વકર્મા નામના શખ્સની ધરપકડ કરી છે. પોલીસે આ આરોપી પાસેથી ગાંજા ઉપરાંત રોકડા રૂ. 1,670 અને મોબાઈલ ફોન મળીને કુલ રૂ.1,03,270નો મુદ્દામાલ કબજે લીધો છે. પોલીસની પ્રારંભિક પૂછપરછમાં આરોપી આ ભાડાના મકાનનો ઉપયોગ નશીલા પદાર્થનું નેટવર્ક ચલાવવા માટે કરતો હોવાનું સામે આવ્યું છે.
ઓલપાડ પોલીસે આરોપી રામેશ્વર વિશ્વકર્મા સામે ગુનો નોંધીને આગળની સઘન તપાસ હાથ ધરી છે. આ ગાંજાનો જથ્થો ક્યાંથી લાવવામાં આવ્યો હતો, તેમાં અન્ય કોણ કોણ સામેલ છે અને આ જથ્થો સ્થાનિક વિસ્તારમાં કોને વેચવાનો હતો તે અંગે પોલીસે વિગતવાર પૂછપરછ શરૂ કરી છે. નશાના આ દૂષણને જળમૂળથી ઉખાડી ફેંકવા માટે પોલીસ આગામી દિવસોમાં આ નેટવર્ક સાથે જોડાયેલા તમામ મુખ્ય સૂત્રધારો સુધી પહોંચવા માટે ચક્ર ગતિમાન કર્યા છે.