સુરત શહેરના ઉધના વિસ્તારમાં આવેલી કૈલાશ નગર સોસાયટીમાં ચાંદીના દાગીના સાફ કરી આપવાના બહાને ઠગાઈ આચરવાની એક ચોંકાવનારી ઘટના સામે આવી છે. બે શંકાસ્પદ ઈસમો કૈલાશ નગરમાં દાગીના ચમકાવવાનું કહીને ફરી રહ્યા હતા અને એક મહિલાને પોતાની જાળમાં ફસાવી ચાંદીની ચેઇન સાફ કરવાના નામે છેતરપિંડી આચરી હતી. જોકે, મહિલાને પોતાની સાથે ઠગાઈ થઈ હોવાનો ખ્યાલ આવી જતાં તેમણે બૂમાબૂમ કરી મૂકી હતી, જેને પગલે સમગ્ર વિસ્તારમાં ચકચાર મચી ગઈ હતી.
સતર્ક સ્થાનિકોએ બંને આરોપીઓને પકડી મેથીપાક ચખાડ્યો
ઠગાઈની જાણ થતાં જ આસપાસના સ્થાનિક રહીશોએ અસાધારણ સતર્કતા દાખવી હતી અને ભાગવાનો પ્રયાસ કરી રહેલા બંને શંકાસ્પદ ઠગબાજોને રંગેહાથ ઝડપી પાડ્યા હતા. છેતરપિંડીના આ બનાવથી રોષે ભરાયેલા લોકોએ બંને આરોપીઓને રસ્તા વચ્ચે જ પકડીને બરાબરનો મેથીપાક ચખાડ્યો હતો. આ દરમિયાન ભોગ બનનાર મહિલાએ પણ ભારે ગુસ્સામાં આવીને બંને ઠગબાજોને જાહેરમાં ચપ્પલ વડે માર માર્યો હતો. જાહેરમાં થયેલા આ હંગામાને જોવા માટે લોકોના ટોળેટોળાં એકઠા થઈ ગયા હતા.