સુરત શહેરના ટેક્સટાઇલ અને હીરા ઉદ્યોગ માટે જાણીતા વરાછા વિસ્તારમાં એક અત્યંત સનસનાટીભરી અને કરૂણ ઘટના સામે આવી છે. વરાછામાં રહેતા અને મજૂરી કામ કરતા સંજય પટેલ નામના શખ્સે પોતાના જ ઘરમાં પત્નીનું ગળું દબાવીને કરપીણ હત્યા કરી નાખી છે. પ્રાથમિક વિગતો મુજબ, પતિ સંજય પટેલ અને તેની પત્ની વચ્ચે છેલ્લા ઘણા વર્ષોથી અંદરોઅંદર ક્ષુલક બાબતોને લઈને તીવ્ર ઘરકંકાસ અને ઝઘડાઓ ચાલી રહ્યા હતા. રોજના ઝઘડાઓથી કંટાળી જઈને પતિએ આવેશમાં આવી આ ભયાનક પગલું ભર્યું હોવાનું સામે આવ્યું છે.
પોલીસ સમક્ષ આરોપી ભાંગી પડ્યો
પત્નીની હત્યા કર્યા બાદ પતિએ મામલો છુપાવવાનો પ્રયાસ કર્યો હતો. જોકે, ઘરમાં માતાની શંકાસ્પદ સ્થિતિ જોઈને પુત્રને પિતાની હરકતો અને બનાવ અંગે ગંભીર શંકા ગઈ હતી. પુત્રએ સમયસૂચકતા વાપરીને આ અંગે તાત્કાલિક વરાછા પોલીસને જાણ કરી હતી. ઘટનાની ગંભીરતાને ધ્યાને લઈ વરાછા પોલીસનો કાફલો સ્થળ પર દોડી આવ્યો હતો. પોલીસે શંકાસ્પદ પિતા સંજય પટેલની આકરી પૂછપરછ હાથ ધરતાં તે ભાંગી પડ્યો હતો અને પત્નીનું ગળું દબાવીને હત્યા કરી હોવાની કબૂલાત કરી હતી.
