સુરત શહેરના પોશ અને શાંત ગણાતા વેસુ વિસ્તારમાં કાયદાનો ભય વગર અસામાજિક તત્વો દ્વારા આચરવામાં આવેલી એક અત્યંત શર્મજનક અને ગંભીર ઘટના સામે આવી છે. એક જમીન દલાલને બ્લેકમેલ કરીને આરોપીઓએ તેને પોતાની કારમાં બેસાડી દીધો હતો. ત્યારબાદ ચાલતી કારમાં જ જમીન દલાલને ધમકાવીને તેની પાસેથી જમીનના અત્યંત મહત્વના દસ્તાવેજો/કાગળો અને ખિસ્સામાંથી ₹5,000 રોકડા જબરદસ્તીથી પડાવી લીધા હતા.
વેસુ વિસ્તારમાં અપહરણ કરી ખંડણી માગી
આટલેથી ન અટકતાં, આરોપીઓએ જમીન દલાલ પાસેથી ₹50 લાખની જંગી રકમની ખંડણી માંગવાનું શરૂ કર્યું હતું. રકમ મેળવવા અને વેપારી પર માનસિક દબાણ બનાવવા માટે બદમાશોએ તેની સાથે અમાનવીય વર્તન કર્યું હતું.આરોપીઓએ કારની અંદર જ જમીન દલાલને સંપૂર્ણ નગ્ન કરી દીધો હતો અને તેને ઢોર માર માર્યો હતો. પીડિત વેપારી માનસિક રીતે ભાંગી પડે તે માટે આરોપીઓએ તેને ધમકી આપી હતી કે જો ₹50 લાખ નહીં મળે તો તેની કિડની વેચી દેવામાં આવશે તેમજ તેના હાથ-પગ ભાંગી નાખવામાં આવશે.