સુરેન્દ્રનગર જિલ્લામાં જુગારની બદીને નાથવા પોલીસે અલગ-અલગ છ સ્થળે રેડ કરી હતી. જેમાં 27 જુગારીયાઓ રોકડ, મોબાઈલ સહિત રૂ. 1,33,450ની મત્તા સાથે પકડાયા છે.
સુરેન્દ્રનગર જિલ્લા એલસીબી પીઆઈ જે.જે.જાડેજાની સુચનાથી ચૂડા તાલુકામાં પેટ્રોલિંગ કરી રહેલ સ્ટાફની ટીમના પ્રવીણ કોલા, ભરતભાઈ સભાડ સહિતનાઓને જોબાળા ગામે ઠાકરના મંદિર પાસે જાહેરમાં અમુક શખ્સો જુગાર રમતા હોવાની બાતમી મળતા રેડ કરાઈ હતી. જેમાં ઘનશ્યામ કરમશીભાઈ લીંબડીયા, રાહુલ બાબુભાઈ શેખ, અશોક તળશીભાઈ તરવાણી, ઘનશ્યામ કુબેરભાઈ શેખ, મેહુલ નટુભાઈ ઘલવાણીયા, મેરૂ ભકાભાઈ પરમાર, રવિન્દ્ર જેમલભાઈ કટુડીયા, રાહુલ નટુભાઈ ઘલવાણીયા અને કીશન અજીતભાઈ પરાલીયા ગંજીપાનાનો જુગાર રમતા પકડાયા હતા. આ શખ્સો પાસેથી રોકડા રૂ. 43,440, 6 મોબાઈલ ફોન સહિત કુલ રૂ.68,940ની મત્તા કબજે કરી ચુડા પોલીસ મથકે ગુનો નોંધવામાં આવ્યો છે. જયારે ધ્રાંગધ્રા તાલુકા પોલીસની ટીમને ચુલીથી પીપળી જવાના રસ્તે આવેલ સંજય કાળુભાઈ રોજારાની વાડીની ઓરડીમાં જુગાર રમાતો હોવાની બાતમી મળતા રેડ કરાઈ હતી. જેમાં સંજય કાળુભાઈ રોજારા, અશ્વીન જગદીશભાઈ પટેલ, વિષ્ણુ જશરાજભાઈ પટેલ, અશોક ધનજીભાઈ આદ્રોલા, ભુપત ગોવિંદભાઈ કટેચીયા, ગણેશ શાર્દુળભાઈ સારદીયા ગંજીપાનાનો જુગાર રમતા ઝડપાયા હતા. આ શખ્સો પાસેથી રોકડા રૂ. 46,050 કબજે કરી ધ્રાંગધ્રા તાલુકા પોલીસ મથકે ફરિયાદ નોંધવામાં આવી છે.
