ગીર સોમનાથ જિલ્લાના ઉના તાલુકામાં મોડી રાત્રે વરસેલા ધોધમાર કમોસમી વરસાદે જળબંબાકારની સ્થિતિ સર્જી છે. વ્યાપક વરસાદના કારણે સમગ્ર વિસ્તાર બેટ માં ફેરવાયો છે, જેના પગલે અનેક ગામો સંપર્ક વિહોણા બન્યા છે અને જનજીવન અસ્તવ્યસ્ત થઈ ગયું છે.
ત્રણ ગામો બન્યા સંપર્ક વિહોણા
ભારે વરસાદને કારણે ઉના તાલુકાના મુખ્ય ત્રણ ગામો સનખડા, ખત્રીવાડા અને સુલતાનપુરા સંપૂર્ણપણે સંપર્ક વિહોણા બની ગયા છે. આ ત્રણેય ગામોમાં રાત્રિના સમયે વરસેલા વ્યાપક વરસાદથી પરિસ્થિતિ ગંભીર બની છે. ખત્રીવાડા ગામમાં તો રાવલ, રૂપેણ અને માલણ જેવી મુખ્ય નદીઓના પાણી ફરી વળ્યા છે. નદીઓમાં ઘોડાપૂરની સ્થિતિ સર્જાઈ છે, જેના કારણે નીચાણવાળા વિસ્તારો અને ખેતરો પાણીમાં ડૂબી ગયા છે. ગામો સંપર્ક વિહોણા બનતા લોકોની હાલાકી વધી છે. ગ્રામજનો જીવના જોખમે ટ્રેક્ટરમાં બેસીને એક ગામથી બીજા ગામ સુધી અવરજવર કરવા મજબૂર બન્યા છે, જે તેમની સુરક્ષા માટે મોટો ખતરો છે.
ખેડૂતોની દયનીય સ્થિતિ
ગીર સોમનાથ જિલ્લાના ગ્રામ્ય વિસ્તારોમાં કમોસમી વરસાદના કારણે ખેડૂતોની સ્થિતિ દયનીય બની છે. નદીઓમાં આવેલા ઘોડાપૂરના પાણી ખેતરોમાં ઘૂસી જતાં, ખેડૂતોના ઊભા પાકને મોટું નુકસાન થયું છે. આ માવઠાના કારણે ખેતીના પાકને પારાવાર નુકસાન થતાં ખેડૂતોની મહેનત પાણીમાં ગઈ છે અને તેમને મોટું આર્થિક સંકટ સર્જાયું છે. વહીવટી તંત્ર દ્વારા તાત્કાલિક ધોરણે આ સંપર્ક વિહોણા ગામોમાં રાહત અને બચાવની કામગીરી હાથ ધરવામાં આવે, તેમજ નુકસાનનો સર્વે કરીને ખેડૂતોને વળતર આપવામાં આવે તેવી સ્થાનિકો દ્વારા માગણી કરવામાં આવી રહી છે.
