વડોદરા શહેરની મધ્યમાં આવેલા મધ્યસ્થ એસએસજી (SSG) હોસ્પિટલ પરિસરમાંથી કેદી ભાગી છૂટવાની એક સનસનાટીભરી ઘટના સામે આવી છે. જેલમાંથી સારવાર અર્થે લવાયેલો કાચા કામનો કેદી જાપ્તાના પોલીસ કર્મચારીઓને અચાનક ધક્કો મારી અને નજર ચૂકવીને હોસ્પિટલ પરિસરમાંથી ભાગી છૂટ્યો હતો. અચાનક બનેલી આ ઘટનાને પગલે જાપ્તાના જવાનોમાં ભારે દોડધામ મચી ગઈ હતી. દર્દીઓ અને દર્દીના સગાથી ધમધમતી હોસ્પિટલમાં સુરક્ષા વ્યવસ્થાને ભેદીને કેદી ભાગી જતાં પોલીસ તંત્રની કામગીરી સામે મોટા સવાલો ઊભા થયા છે.
બાંધકામ હેઠળની બિલ્ડિંગમાં છુપાયાની શંકા
કેદી હોસ્પિટલ કેમ્પસમાં જ ચાલી રહેલા નવનિર્માણ પામી રહેલા બાંધકામ હેઠળના વિશાળ બિલ્ડિંગમાં છુપાયો હોવાની પ્રબળ આશંકા સેવાઈ રહી છે. હોસ્પિટલનું પરિસર અત્યંત મોટું અને બાંધકામ હેઠળની જગ્યાઓ હોવાથી કેદીને શોધવા માટે પોલીસે અત્યાધુનિક ડ્રોન કેમેરાની મદદ લીધી છે. આકાશમાંથી ડ્રોન મારફતે આખી બિલ્ડિંગ અને ખૂણેખૂણાનું બારીકાઈથી નિરીક્ષણ કરીને સર્ચ ઓપરેશન ચલાવવામાં આવી રહ્યું છે, જેથી અંધારા કે છૂપા ખૂણામાં સંતાયેલા કેદીને ઝડપથી શોધી શકાય.