Vadodara: ફતેહગંજમાંથી MBAના વિદ્યાર્થીનો શંકાસ્પદ હાલતમાં મૃતદેહ મળ્યો, પોલીસ તપાસ શરૂ

વડોદરા શહેરમાં ફતેહગંજ વિસ્તારમાંથી એક ચોંકાવનારો બનાવ સામે આવ્યો છે, જ્યાં પારુલ યુનિવર્સિટીમાં MBAનો અભ્યાસ કરતા એક વિદ્યાર્થીનો મૃતદેહ શંકાસ્પદ હાલતમાં મળી આવ્યો છે. આ ઘટનાને પગલે વિદ્યાર્થી જગતમાં અને તેના મિત્રોમાં શોકની લાગણી ફેલાઈ છે.

 બ્લ્યુ લગુન હોટલ પાછળની સોસાયટીમાં ઘટના

આ બનાવ વડોદરા શહેરના ફતેહગંજ વિસ્તારમાં આવેલ બ્લ્યુ લગુન હોટલ પાછળની એક સોસાયટીમાં બન્યો હતો. મૃતક વિદ્યાર્થીનું નામ અતિક દાસ છે. પ્રાથમિક માહિતી મુજબ, તે મૂળ હરિયાણાનો વતની હતો અને હાલમાં સોસાયટીમાં આવેલ પી.જી. (પેઇંગ ગેસ્ટ) માં રહેતો હતો. અતિક દાસ પારુલ યુનિવર્સિટીમાં MBAના બીજા વર્ષમાં અભ્યાસ કરતો હતો. મૃતકનું અન્ય એક નામ 'ગતીક અજયકુમાર દાસ' અને વતન 'જમ્મુ કાશ્મીર' હોવાની પણ માહિતી મળી છે, જોકે પોલીસે હાલ હરિયાણાના વતની તરીકેની ઓળખ પર વધુ ધ્યાન કેન્દ્રિત કર્યું છે.

 પી.જી. માલિકે પોલીસને કરી જાણ

વિદ્યાર્થીનો મૃતદેહ પી.જી.માં શંકાસ્પદ અવસ્થામાં મળી આવતા, પી.જી.ના માલિકે તાત્કાલિક આ અંગે ફતેહગંજ પોલીસ અને એમ્બ્યુલન્સને જાણ કરી હતી. પોલીસ અને એમ્બ્યુલન્સની ટીમ ઘટનાસ્થળે દોડી આવી હતી. યુવકને જોતા તે મૃત જાહેર કરાયો હતો. ફતેહગંજ પોલીસે આ મામલે અકસ્માત મોતનો ગુનો નોંધીને વધુ તપાસ હાથ ધરી છે. મૃતદેહને પોસ્ટમોર્ટમ (પીએમ) અર્થે હોસ્પિટલમાં મોકલી આપવામાં આવ્યો છે.

 કુદરતી મૃત્યુ કે આત્મહત્યા?

પોલીસે હાલ બે મુખ્ય દિશાઓમાં તપાસ શરૂ કરી છે. આ મૃત્યુ કુદરતી મૃત્યુ છે. વિદ્યાર્થીએ કોઈ કારણોસર આત્મહત્યા કરી છે. પોસ્ટમોર્ટમ રિપોર્ટ આવ્યા બાદ જ વિદ્યાર્થીના મૃત્યુનું ચોક્કસ કારણ જાણી શકાશે. હાલ પોલીસે તેના મિત્રો અને પી.જી.માં રહેતા અન્ય વિદ્યાર્થીઓની પૂછપરછ શરૂ કરી છે.