વડોદરા ગ્રામ્ય પોલીસની સાયબર ક્રાઇમ અને ટેકનિકલ ટીમને ઓનલાઇન ફ્રોડના ગુનાઓ ડામવા માટે શરૂ કરાયેલા "ઓપરેશન પરાક્રમ" હેઠળ એક મોટી સફળતા મળી છે. વિદેશથી આવેલા પાર્સલને છોડાવવાના બહાને એક નાગરિક સાથે રૂ.1.45 લાખની ઓનલાઇન ઠગાઈ કરનાર સાયબર ફ્રોડસ્ટરને શિનોર પોલીસની ટીમે છેક મુંબઈ જઈને દબોચી લીધો છે.
ગુગલ પે દ્વારા પડાવ્યા હતા નાણાં
સાયબર ગુનેગારોએ ભોગ બનનાર વ્યક્તિને તમારું એક પાર્સલ વિદેશથી આવ્યું છે અને તેમાં ગેરકાયદે સામગ્રી હોવાથી સીઆઈડી (CID) તથા કુરિયર વિભાગે તે અટકાવ્યું છે તેમ કહી ડરાવ્યા હતા. આ નકલી કેસમાંથી બહાર નીકળવા અને પાર્સલ છોડાવવાના બહાને ભેજાબાજોએ ભોગ બનનાર પાસેથી ગુગલ પે (Google Pay) તેમજ અલગ-અલગ બેંક ખાતાઓમાં ઓનલાઇન ટ્રાન્સફર કરાવીને કુલ રૂ.1,45,000 પડાવી લીધા હતા. આ અંગે શિનોર પોલીસ મથકે ફરિયાદ નોંધાતા પોલીસે તપાસ શરૂ કરી હતી.
