વડોદરા અને તેની આસપાસમાંથી પસાર થતા નેશનલ હાઈવે અને કનેક્ટિંગ બ્રિજ હવે વાહનચાલકો માટે ડેથ ટ્રેપ એટલે કે મરણિયા સાબિત થઈ રહ્યા છે. વડોદરાના છાણી પોલીસ સ્ટેશનની હદમાં આવતા દશરથ ગામના ઓવરબ્રિજ પર આજે સવારના સમયે એક હૃદયદ્રાવક અકસ્માતની ઘટના સામે આવી છે. રોજિંદા ક્રમ મુજબ હેમાબેન પંડ્યા નામના મધ્યમવયસ્ક મહિલા પોતાના મોપેડ પર સવાર થઈને નોકરીએ જવા માટે નીકળ્યા હતા. તેઓ દશરથ ગામના બ્રિજ પરથી પસાર થઈ રહ્યા હતા ત્યારે પાછળથી પૂરપાટ ઝડપે અને ગફલતભરી રીતે આવેલા એક ડમ્પરના ચાલકે તેમના મોપેડને જોરદાર ટક્કર મારી અડફેટે લીધા હતા.
અકસ્માત એટલો પ્રચંડ હતો કે હેલ્મેટ પણ ટૂંકું પડ્યું
સામાન્ય રીતે ટૂ-વ્હીલર અકસ્માતમાં હેલ્મેટ ન પહેરવાના કારણે માથામાં ગંભીર ઇજા થવાથી મોત થતા હોય છે, પરંતુ આ કિસ્સામાં હેમાબેન એક જાગૃત નાગરિક તરીકે પ્રોપર હેલ્મેટ પહેરીને જ નીકળ્યા હતા. છતાં, ડમ્પરની સ્પીડ અને ટક્કર એટલી જોરદાર હતી કે હેમાબેન રોડ પર પટકાયા બાદ ડમ્પરનું વજનદાર ટાયર તેમના પર ફરી વળ્યું હતું. જેના કારણે શરીરે અને માથાના ભાગે કચડાઈ જવાથી અતિશય ગંભીર ઇજાઓ થઈ હતી અને 108 એમ્બ્યુલન્સ પહોંચે તે પહેલા જ શ્વાસ વહી ગયા હતા. બ્રિજ પર લોહીલુહાણ હાલતમાં મહિલાનો મૃતદેહ જોઈને પસાર થતા વાહનચાલકો કમ્પી ઉઠ્યા હતા.