વડોદરા શહેરના અતિ વ્યસ્ત ગણાતા ફતેગંજ બ્રિજ પર એક જીવલેણ માર્ગ અકસ્માત ની ઘટના સામે આવી છે. પુરઝડપે જઈ રહેલી એક એસટી (ST) બસ અને એક્ટિવા વચ્ચે ગંભીર અકસ્માત સર્જાયો હતો. ટક્કર એટલી ભયાનક હતી કે એક્ટિવા ચાલક યુવતી બસની ઝપેટમાં આવી ગઈ હતી અને ગંભીર રીતે ઇજાગ્રસ્ત થઈ હતી.
વાડી વિસ્તારની યુવતીનું ઘટનાસ્થળે જ નીપજ્યું મોત
આ કરૂણ દુર્ઘટનામાં એક્ટિવા સવાર અને વડોદરાના વાડી વિસ્તારની રહેવાસી તૃપ્તિ માળી નામની યુવતીનું કરૂણ મોત નીપજ્યું છે. ઘટનાને પગલે બ્રિજ પર લોકોના ટોળાં એકઠા થઈ ગયા હતા. અકસ્માત સર્જાયા બાદ ગભરાઈ ગયેલો એસટી બસ ચાલક બસ સ્થળ પર જ મૂકીને ઘટનાસ્થળેથી ફરાર થઈ ગયો હતો. ઘટનાની જાણ થતાં જ સ્થાનિક પોલીસનો કાફલો સ્થળ પર પહોંચ્યો હતો અને મૃતદેહને પોસ્ટમોર્ટમ અર્થે ખસેડી આગળની કાનૂની કાર્યવાહી હાથ ધરી હતી.