વડોદરા શહેરના નવાયાર્ડ વિસ્તારમાં થોડા દિવસો પહેલાં એક ઊભેલી કારમાં અચાનક આગ લાગ્યા બાદ થયેલા ભીષણ બ્લાસ્ટના મામલામાં પોલીસે મોટો અને ચોંકાવનારો ઘટસ્ફોટ કર્યો છે. આ કોઈ આકસ્મિક દુર્ઘટના નહોતી, પરંતુ પૂર્વ આયોજિત અંગત અદાવતના કારણે કારમાં જાણી જોઈને આગ લગાડવામાં આવી હોવાનું પોલીસ તપાસમાં બહાર આવ્યું છે. ફતેગંજ પોલીસ સ્ટેશનની ટીમે આ ગંભીર કેસમાં આરોપી જયેશ સોલંકી ની ધરપકડ કરીને સળગતો ઘટસ્ફોટ કર્યો છે.
કાર માલિક પ્રિતેશ મકવાણા સાથે હતો અણબનાવ
પ્રાપ્ત વિગતો અનુસાર, વડોદરાના નવાયાર્ડ વિસ્તારમાં રહેતા કાર માલિક પ્રિતેશ મકવાણા સાથે પકડાયેલા આરોપી જયેશ સોલંકીને અગાઉથી જ કોઈ અંગત બાબતે અણબનાવ અને મનદુઃખ ચાલી રહ્યું હતું. આ જ અદાવત અને બદલાની ભાવનાથી પ્રેરાઈને આરોપીએ પ્રિતેશ મકવાણાની કારને જાનથી નુકસાન પહોંચાડવાનું કાવતરું ઘડ્યું હતું.
પેટ્રોલ છાંટીને કાર સળગાવી, નિરાંતે જઈને સુઈ ગયો આરોપી
આરોપી જયેશ સોલંકીએ બે દિવસ અગાઉ રાત્રિના સમયે પ્રિતેશ મકવાણાની કાર પર જ્વલનશીલ પ્રવાહી એટલે કે પેટ્રોલ છાંટીને ભીષણ આગ લગાડી દીધી હતી. હીન કૃત્ય આચર્યા બાદ આરોપીને જરા પણ પસ્તાવો ન થયો અને તે પોતાના ઘરે જઈને એકદમ શાંતિથી સૂઈ ગયો હતો. કારમાં લાગેલી આગ બાદ અંદર રહેલા ગેસ સિલિન્ડર કે અન્ય કારણસર ધડાકાભેર બ્લાસ્ટ થયો હતો, જેના કારણે આસપાસના વિસ્તારમાં ભારે નાસભાગ અને ગભરાટ ફેલાઈ ગયો હતો. આ ગંભીર અકસ્માત અને આગની ઘટનામાં 4 નિર્દોષ લોકો ગંભીર રીતે ઇજાગ્રસ્ત થયા હતા.
CCTV ફૂટેજના આધારે પોલીસ ફતેગંજ પોલીસની મોટી કાર્યવાહી
આ સમગ્ર ઘટના બાદ ફતેગંજ પોલીસ સ્ટેશનના ઉચ્ચ અધિકારીઓ અને તપાસ ટીમ દ્વારા આસપાસના વિસ્તારોના સીસીટીવી (CCTV) ફૂટેજ ની સઘન ચકાસણી કરવામાં આવી હતી. ફૂટેજના ટેક્નિકલ પુરાવા અને બાતમીદારોના આધારે આખો મામલો બહાર આવ્યો હતો અને પોલીસે ગણતરીની કલાકોમાં જ આરોપી જયેશ સોલંકીને સકંજામાં લઈ લીધો છે. પોલીસે કાયદેસરની કાર્યવાહી હાથ ધરીને વધુ તપાસ આરંભી છે.
ગુજરાતના વધુ સમાચાર વાંચવા માટે ક્લિક કરો
