વડોદરા શહેરના રિયલ એસ્ટેટ ક્ષેત્રમાંથી એક મોટા સમાચાર સામે આવ્યા છે. વડોદરાના જાણીતા સીધેશ્વર ગ્રુપ અને 'સીધેશ્વર પ્રાઇમ પ્લસ' યોજનાના બિલ્ડર પાનસુરિયા બંધુઓની વડોદરા પોલીસે ધરપકડ કરી લીધી છે. ધરપકડ કરાયેલા આરોપી બિલ્ડરોમાં સુરેશ પાનસુરિયા અને મનીષ પાનસુરિયાનો સમાવેશ થાય છે. આ બિલ્ડર બંધુઓએ ગ્રાહકો પાસેથી ફ્લેટ બુકિંગના કરોડો રૂપિયા મેળવ્યા બાદ પ્રોજેક્ટનું કામકાજ અધૂરું છોડીને ફરાર થઈ ગયા હતા, જેને પગલે તેમની સામે છેતરપિંડીની ગંભીર ફરિયાદો નોંધાઈ હતી.
ઠેકરનાથ વિસ્તારના અનેક રોકાણકારો છેતરાયા
આ બિલ્ડર બંધુઓ સામે વડોદરાના હરણી પોલીસ સ્ટેશનમાં છેતરપિંડી અને વિશ્વાસઘાત સહિતનો ગુનો દાખલ કરવામાં આવ્યો હતો. ગુનો નોંધાયા બાદ હરણી પોલીસ મથકની ટીમે ચક્રગતિમાન કરીને બંને આરોપી બિલ્ડરોની ધરપકડ કરી છે. ખાસ કરીને ઠેકરનાથ વિસ્તારમાં સીધેશ્વર ગ્રુપની સાઈટ પર મોટી સંખ્યામાં લોકોએ પોતાના સ્વપ્નના ઘર માટે જીવનભરની મૂડી રોકી હતી, પરંતુ બિલ્ડર બંધુઓએ સાઈટનું કામ અધૂરું મૂકી ભાગી જતાં રોકાણકારો અને ગ્રાહકો રસ્તે રઝળતા થઈ ગયા હતા.