વડોદરા-અમદાવાદ નેશનલ હાઈવે પર આવેલા દેણા ચોકડી નજીક એક અત્યંત ચોંકાવનારી અને સનસનાટીભરી ચોરીની ઘટના સામે આવી છે. એક કન્સ્ટ્રક્શન કંપનીના એન્જિનિયર કારને પાર્ક કરીને હાઈવે પર આવેલી હોટેલ પર ચા-પાણી પીવા માટે ગયા હતા. ચા પીને માત્ર 10 જ મિનિટના ટૂંકા સમયમાં તેઓ પરત ફર્યા ત્યારે કારનો કાચ તૂટેલી હાલતમાં હતો અને અંદર મૂકેલી રૂ.35 લાખની માતબર રોકડ ભરેલી બેગ ગાયબ થઈ ગઈ હતી.
કર્મચારીઓના પગાર માટે લાવ્યા હતા રોકડ
દિવાળીનો તહેવાર નજીક આવી રહ્યો હોવાથી કંપનીના કર્મચારીઓને પગાર ચૂકવવા તથા સપ્લાયરોના બાકી પેમેન્ટ પતાવવા માટે બેંકમાંથી રૂ.35 લાખની રોકડ ઉપાડીને કારમાં રાખવામાં આવી હતી. એન્જિનિયર કાર લોક કરીને ચા પીવા ગયા હતા, પરંતુ તસ્કરો પહેલેથી જ રેકી કરીને કારનો પીછો કરી રહ્યા હોવાની આશંકા સેવાઈ રહી છે.