વડોદરા જિલ્લાના સાવલી તાલુકામાં બેફામ અને બેદરકાર વાહનચાલકોનો આતંક સતત વધી રહ્યો છે, ત્યારે અમરાપુર ગામ નજીક એક અત્યંત ગમખ્વાર માર્ગ અકસ્માત સર્જાયો છે. નોકરી પરથી પોતપોતાના ઘરે પરત ફરી રહેલા બે આશાસ્પદ યુવાનોને એક ડમ્પરચાલકે કાળનો કોળિયો બનાવી લીધા હતા. આ ભયાનક અકસ્માતના કારણે મૃતક યુવાનોના પરિવારજનોમાં ભારે શોક અને વિસ્તારમાં ભારે અરેરાટી વ્યાપી ગઈ છે.
ઓવરટેકિંગ દરમિયાન ગમખ્વાર અકસ્માત સર્જાયો
સાવલીના અમરાપુર નજીકથી પસાર થઈ રહેલા ડમ્પરચાલકે ગફલતભરી રીતે ઓવરટેકિંગ કરવાનો પ્રયાસ કર્યો હતો. આ ઓવરટેકિંગ દરમિયાન ડમ્પરે સામેથી આવી રહેલા યુવાનોની બાઇકને જોરદાર ટક્કર મારી હતી. આ અકસ્માત એટલો ભયાનક હતો કે રાતડીયા ગામના બે આશાસ્પદ યુવાનોના ઘટનાસ્થળે જ અથવા ગંભીર ઈજાઓના કારણે કરૂણ મોત નીપજ્યા હતા.