વડોદરા મહાનગરપાલિકાના વોર્ડ નંબર 10ના તાંદલજા વિસ્તારમાં તંત્ર દ્વારા અસ્વચ્છતા અને ગંદકી સામે કડક ઝુંબેશ હાથ ધરવામાં આવી છે. જાહેર આરોગ્ય અને સ્વચ્છતાના નિયમોનું ઉલ્લંઘન કરનારા વેપારીઓ સામે પાલિકાની ટીમે લાલ આંખ કરીને મોટી કાર્યવાહી કરી છે. તપાસ દરમિયાન અસ્વચ્છતા મળી આવતાં પાંચ જેટલી જાણીતી રેસ્ટોરન્ટ્સ અને અન્ય કોમર્શિયલ એકમોને તંત્ર દ્વારા સ્થળ પર જ સીલ મારી દેવામાં આવ્યા છે.
સ્વચ્છતાના નિયમોનું ઉલ્લંઘન અને કડક કાર્યવાહી
પાલિકાની ટીમ દ્વારા તાંદલજા વિસ્તારમાં આવેલા ખાણીપીણીના સ્થળો અને કોમર્શિયલ એકમોમાં સરપ્રાઈઝ ચેકિંગ હાથ ધરવામાં આવ્યું હતું. આ તપાસ દરમિયાન અનેક એકમોમાં સ્વચ્છતાના પ્રાથમિક નિયમોનું ખુલ્લેઆમ ઉલ્લંઘન થતું હોવાનું અને ગંદકીનું સામ્રાજ્ય હોવાનું સામે આવ્યું હતું. ગંભીર બેદરકારી દાખવનારા આ પાંચેય એકમો સામે તંત્રએ ક્ષણનો પણ વિલંબ કર્યા વિના કડક કાનૂની અને સીલિંગની કાર્યવાહી હાથ ધરી હતી.