સેલવાસના પિપરિયા વિસ્તારમાં છઠ પૂજાની તૈયારીઓ ચાલી રહી હતી તે દરમિયાન કુદરતી આફતને કારણે એક અત્યંત દુઃખદ દુર્ઘટના બની છે. વીજળી પડવાથી માતા અને પુત્રીનું કરુણ મોત નીપજ્યું છે, જ્યારે અન્ય એક મહિલા ગંભીર રીતે ઘાયલ થતાં વિસ્તારમાં શોકનો માહોલ છવાઈ ગયો છે.
સેલવાસમાં વીજળી પડતા માતા-પુત્રીના મોત
પ્રાપ્ત માહિતી અનુસાર, પિપરિયા વિસ્તારમાં રહેતા પરપ્રાંતીય સમુદાયના લોકો છઠ પૂજા માટે ઘાટ તૈયાર કરી રહ્યા હતા. આ દરમિયાન બે મહિલાઓ અને એક બાળકી ઘાટની સફાઈ કરવા તેમજ પૂજા માટે જરૂરી લાકડાં એકઠા કરવા માટે નજીકના કેરીના ઝાડની પાસે કામ કરી રહ્યા હતા. બપોરના સમયે અચાનક વાતાવરણમાં પલટો આવ્યો હતો. ભારે પવન અને વરસાદ શરૂ થતાં જ નજીકના આંબાના વૃક્ષ પર જોરદાર વીજળી ત્રાટકી હતી. આ વીજળીનો શક્તિશાળી આંચકો ઝાડ નીચે ઊભેલી ત્રણેય વ્યક્તિઓને લાગ્યો હતો.
