પંચમહાલ જિલ્લા પર મેઘરાજાએ જાણે પૂરતો આશીર્વાદ વરસાવ્યો હોય તેવી સ્થિતિ ગત રાતથી જોવા મળી રહી છે. જિલ્લાના તમામ તાલુકાઓમાં ગત રાતથી શરૂ થયેલો ધોધમાર વરસાદ આજે સવાર સુધી અવિરત ચાલુ રહ્યો છે. આ ભારે વરસાદના કારણે પંચમહાલના આર્થિક અને ભૌગોલિક હબ ગણાતા હાલોલ અને જાંબુઘોડા વિસ્તારની સ્થિતિ અત્યંત વિકટ બની ગઈ છે. હાલોલમાં માત્ર થોડા જ કલાકોમાં 4.5 ઇંચ જેટલો ભારે વરસાદ ખાબકતા સોસાયટીઓ અને મુખ્ય બજારોમાં ગોઠણસમા પાણી ભરાઈ ગયા છે.
વાહનોની લાંબી કતારો, હાઇવે સંપર્ક વિહોણો
ભારે વરસાદની સૌથી ગંભીર અસર વાહનવ્યવહાર પર પડી છે. હાલોલથી બોડેલીને જોડતો મુખ્ય હાઇવે સંપૂર્ણપણે બંધ કરવાની ફરજ પડી છે. હાઇવે પર ખાખરીયા ગામ નજીક બ્રિજના કામકાજ માટે વહીવટી તંત્ર દ્વારા બનાવવામાં આવેલું મોટું વૈકલ્પિક ડાયવર્ઝન પાણીના પ્રચંડ પ્રવાહમાં ધોવાઈ ગયું છે. ડાયવર્ઝન ધોવાઈ જવાના કારણે હાઇવેની બંને બાજુએ એસ.ટી. બસો, ટ્રકો અને ખાનગી વાહનોની માઇલો લાંબી કતારો લાગી ગઈ છે. જાંબુઘોડામાં પણ 3.5 ઇંચથી વધુ વરસાદ ખાબકતા વનરાજી અને પહાડી વિસ્તારોમાંથી પાણી સીધા રહેણાંક વિસ્તારોમાં ઘૂસી ગયા છે, જેને કારણે વહીવટી તંત્ર એલર્ટ મોડ પર આવી ગયું છે.