ભુજના ચકચારી હનીટ્રેપ કેસમાં પોલીસે વધુ બે આરોપીઓની ધરપકડ કરી

• આરોપી જયંતિ ઠક્કર અને કુશલ ઠક્કરની અમદાવાદથી ધરપકડ
  
• આદિપુરના વેપારીને હનીટ્રેપમાં ફસાવી રૂ.10 કરોડની ખંડણી માંગી હતી
• ભુજ બી.ડીવીજન પોલીસ સ્ટેશનમાં 8 આરોપી સામે ફરિયાદ નોધાઇ હતી

ભુજના ચકચારી હનીટ્રેપ કેસમાં પોલીસે વધુ બે આરોપીઓની ધરપકડ કરી છે. પશ્ચિમ કચ્છ પોલીસે આરોપી જયંતિ ઠક્કર અને કુશલ ઠક્કરની અમદાવાદથી ધરપકડ કરી છે. હાલ પોલીસે બંને આરોપીઓના રિમાન્ડ મેળવી વધુ તપાસ હાથ ધરી છે.

આદિપુરના વેપારીને હનીટ્રેપમાં ફસાવી રૂપિયા દસ કરોડની ખંડણી માંગવામાં આવી હતી. આ અંગે ભુજ બી.ડીવીજન પોલીસ સ્ટેશનમાં આઠ આરોપી સામે ફરિયાદ નોધાઇ હતી. અગાઉ આ કેસમાં બિલ્ડર વિનય રેલોન અને મહિલા આરોપી આશા ઘોરીની ધરપકડ થઇ ચુકી છે. આજે પશ્ચિમ કચ્છ પોલીસે આ કેસમાં વધુ બે આરોપીની ધરપકડ કરી છે. આરોપી જયંતિ ઠક્કર અને તેના ભાણેજ કુશલ ઠક્કરની અમદાવાદથી ધરપકડ કરી છે. આરોપી જયંતી ઠક્કર પૂર્વ ધારસભ્ય જયંતિ ભાનુશાળી હત્યા કેસનો આરોપી છે. જયંતી ઠક્કર સામે ૧૯ જેટલા ગુના નોધાયેલા છે. હાલ પોલીસે બંને આરોપીના રિમાન્ડ મેળવી વધુ તપાસ હાથ ધરી છે.

આદિપુરના વેપારી અનંત ઠક્કરને હનીટ્રેપમાં ફસાવીને યુવતી સાથેનું અંગતપળોનું રેકોર્ડિંગ વાયરલ કરવાની ધમકી આપી રૂ.૧૦ કરોડની ખંડણી માંગવામાં આવી હતી. આ ચકચારી હનીટ્રેપ કેસમાં અત્યાર સુધીમાં ચાર આરોપીની ધરપકડ કરવામાં આવી છે. જયારે અન્ય ફરાર આરોપીની ઝડપી પાડવા માટે અલગ અલગ ટીમો બનાવામાં આવી છે. બે આરોપીને પોલીસે સમન્સ મોકલ્યું છે. કચ્છ લડાયક મંચના રમેશ જોષી અને તેના ભાઈ શંભુ જોષીને પોલીસે સમન્સ પાઠવ્યું છે. બંને આરોપી આવતીકાલે પોતાના નિવેદન માટે પોલીસ સમક્ષ હાજર થાય તેવી શક્યતા છે.

હાલ પોલીસે બંને આરોપીની ધરપકડ કરીને વધુ તપાસ હાથ ધરી છે. સાથે જ પોલીસે અન્ય લોકોને અપીલ કરી છે કે ઝડપાયેલા આરોપીઓ દ્વારા અન્ય લોકોને હનીટ્રેપમાં ફસાવી ખંડણી માગી હોય તો પોલીસ ફરિયાદ માટે આગળ આવે.